Ўзбекистонда 2023 йил январь–июнь ойларида жами 383 дона автобус ишлаб чиқарилди. Бу ҳақда Статистика агентлиги хабар берди.
Йиллар кесимида автобус ишлаб чиқариш ҳажми:
- 2021 йил январь–июнь — 495 та;
- 2022 йил январь–июнь — 483 та;
- 2023 йил январь–июнь — 383 та.
Қайд этилишича, мамлакатда 2023 йилнинг июнь ойида 43 дона автобус ишлаб чиқарилган.
Апрель бошида “Янги Ўзбекистон” боғида Хитойдан олиб келинган 268 та автобус ва электробусларни топшириш маросими бўлиб ўтганди. Ушбу жамоат транспорти воситаларининг 101 таси электробус, 109 таси газда ҳаракатланувчи (12 метрли) автобус, 48 таси катта сиғимли (“гармошка”) автобуслардир. Мазкур автобус ва электробуслар Кing Long ва Yutong компаниялари томонидан ишлаб чиқарилган.
Автобусларда “кунлик планлар”нинг бекор бўлиши
Тошкентда 5 май кунидан бошлаб, 5, 11, 18, 19, 37, 44, 67, 77, 83, 136, 139, 142, 72 ва 81-сонли пойтахт бўйлаб ҳаракатланувчи автобус йўналишларида хизмат кўрсатиш янги турдаги брутто-шартнома асосида ташкил этилган.
Брутто-шартномалар — бу йўловчи ташишни ташкил этиш модели бўлиб, унда барча тушумлар шаҳар бюджетининг махсус ҳисоб рақамига ўтказилади ва шаҳар маъмурияти йўловчи ташувчига йўналишлар бўйича тўловларни бажарилган иш ҳажмидан келиб чиқиб, сифат назорати остида ўтказиб беради.
Қулай тарифлар
Мазкур қарор билан жамоат транспортидан фойдаланишда йўловчилар учун қулай тарифларни жорий этиш белгиланган. Гап бир соат ичида бир йўналишли йўловчи транспортидан бошқасига ўтиш сонидан келиб чиққан ҳолда имтиёзли ва бепул тарифлар қўлланилиши ҳақида кетмоқда.
Бундан ташқари, йўналишли йўловчи транспортидан фойдаланишда, унинг туридан қатъи назар, кунлик, бир, уч ва олти ойлик, йиллик чекланган ва чекланмаган тариф режалари жорий этилиши кутилмоқда. Йўналишларда йўлкира ҳақини тўлашда электрон тўлов тизимидан фойдаланишни рағбатлантирувчи тарифлар белгиланади.
Изоҳ (0)