Тошкентда яна 59 та электробус йўналишларга чиқарилди

Тошкент шаҳри йўловчилари учун яна 59 та Yutong электробуслари йўналишларга чиқарилди. Бу ҳақда “Тошшаҳартрансхизмат” матбуот хизмати хабар берди.

20 апрель куни пойтахт йўловчилари учун Хитойдан келтирилган 169 та Yutong электробуслари ҳаракатланишни бошлаганди. 11 май куни шундай автобуслардан яна 59 таси ҳаракатланишни бошлади. 

“Тошшаҳартрансхизмат” хабарига кўра, шундан 40 донаси 8 (4 та), 85 (10 та), 45 (12 та), 40 (14 та) сонли автобус йўналишларига чиқарилди.

Бундан ташқари, 13 Т, 57, 67 ва 96-йўналишларига 1 тадан, 51 ва 53-йўналишларига 3 тадан, 100-йўналишга 4 та, 94-йўналишга эса 5 та шундай электробуслар қўшилди.

Пойтахтда янгиланаётган автобуслар

Президентнинг 2023 йил 16 февралдаги “Жамоат транспорти тизимини ислоҳ қилиш чора-тадбирлари тўғрисида”ги қарорига асосан, Тошкент шаҳри жамоат транспорти учун Хитойда ишлаб чиқарилган 1 000 та автобус харид қилиниши белгиланган. Шундан 200 дона 18 метрли ва 500 дона 12 метрли табиий газда ишлайдиган автобуслар ҳамда 300 дона 12 метрли электробуслардир.