“Тошшаҳартрансхизмат” пойтахтдаги жамоат транспортларига аёл ва эркаклар учун махсус жой ажратилганини тарғиб қилувчи қоғозлар ёпиштирилгани тасвирланган суратларга муносабат билдирди.
Ижтимоий тармоқларда 43-сонли йўналишдаги автобус салонида аёллар ва эркаклар учун махсус жой ажратилганини тарғиб қилувчи эълон жойлаштирилгани акс этган танқидий фото тарқалди.
“Тошшаҳартрансхизмат” АЖнинг масъул ходимлари томонидан тезкор текширув ўтказилганда, ушбу ҳолат “8-Автобус саройи” филиали тасарруфидаги, сарой рақами 433-бўлган, Isuzu’да аниқланган ҳамда автобус салонидаги мазкур эълон тезкорлик билан олиб ташланган.
Қайд этилишича, юқоридаги каби ҳолатларни бартараф этиш мақсадида, барча автобус ҳайдовчилари ва чиптачилари ўртасида навбатдан ташқари йўриқномалар ўтказилган. Шунингдек, автобус салонида турли хилдаги ахборот материаллари тарқатилишининг олдини олиш, жамоат транспортида эълон қилиниши белгиланмаган махсус постерлардан фойдаланмаслик ҳамда иш фаолияти давомида ҳайдовчи ва чиптачилардан янада ҳушёр ҳолда иш юритишлари юзасидан тушунтириш ишлари олиб борилган.
Шу билан бирга, “Тошшаҳартрансхизмат” апрель ойида Хитойдан олиб келинган газ ва электрда ҳаракатланувчи катта сиғимли автобусларнинг 400 донаси 20 апрель кунидан бошлаб, автобус йўналишларида аҳолига хизмат кўрсатиш учун бириктирилишини маълум қилди.
Хитойнинг Yutong Bus Cо Ltd компанияси ва “Тошшаҳартрансхизмат” ўртасида тузилган шартномага асосан, 2023 йилнинг март ойи якунига қадар Yutong автобусларининг 1-партияси, яъни 110 дона автобус ва 150 дона электробус Ўзбекистонга етказиб берилиши кутилаётгани тўғрисида хабар берилганди.
Давлат раҳбари 13 декабрь куни Учтепа тумани фаоллари билан ўтказилган йиғилишда бош вазирга март ойигача Тошкентга 1 000 та автобус олиб келиш бўйича топшириқ берганини айтганди. “Жамоат транспортини ислоҳ қилишимиз зарур. Ютуқлар билан бирга, камчиликларимиз ҳам жуда кўп”, — деганди президент.
Изоҳ (0)