Ҳиндистоннинг Уттар-Прадеш штати Греатер Ноида шаҳрида 28 ёшли аёл Никки Пайла 6 ёшли ўғлининг кўз ўнгида ўз эри томонидан тириклайин ёқиб юборилди. Бу ҳақда The Independent хабар берди.

Маълум бўлишича, марҳуманинг эри ва қайната-қайнанаси аёлдан узлуксиз равишда қимматбаҳо совғалар талаб қилиб келган. Натижа бўлмагач, Никки Пайла 21 август куни эри Випин Бҳати томонидан тез ёнувчан бўёқ суюлтиргич ёрдамида тириклайин ёқиб юборилган. Пайланинг оиласи полицияга берган аризада куёв томони 3,5 миллион рупий (тахминан 500 миллион сўм) ва қимматбаҳо автомобиль талаб қилганини билдирган.
Полиция маълумотларига кўра, асосий гумонланувчи – Випин Бҳати 24 август куни ҳибсга олинган. Эркак қочишга уринганда полиция уни оёғидан отиб, қўлга олган. Эркак терговда қилмишидан афсусда эмаслигини билдирган.
“Мен афсусланаётганим йўқ. Мен уни ўлдирмаганман. У ўзи вафот этди. Эр-хотин орасида тортишув бўлиши одатий ҳол”, деган у.

Шунингдек, эркакнинг онаси ҳам ҳибсга олинган — у Никки Пайлага доимий руҳий ва жисмоний зўравонлик кўрсатганликда айбланмоқда. Полиция 25 август куни тергов доирасини кенгайтириб, Бҳати оиласининг яна икки аъзосини — Випиннинг отаси Сатя Вир (55 ёш) ва укаси Роҳит Бҳати (28 ёш)ни қўлга олган.
Воқеа ҳақида илк маълумотлар Касна полициясига Фортис хусусий шифохонасидан келиб тушган. У ерда марҳума оғир куйиш тан жароҳатлари билан қабул қилинган ва кейинчалик уни Деҳлидаги Сафдаржунг шифохонасига юборилган. Афсуски, Никки йўлда вафот этган.
Терговга кўра, аёл кучли ёнувчи модда билан ёқиб юборилган. Полиция ҳозирда бу ишни ҳар томонлама ўрганмоқда. Никки Пайланинг опаси Канчан (у ҳам Бҳати оиласига келин бўлган) марҳума кўрган зўравонликлар акс этган видеоларни ижтимоий тармоқларда тарқатган. Бу видеолар ҳам ишга далил сифатида қўшилган.
“Опаси бизга ариза билан мурожаат қилиб, куёв ва унинг оиласини жавобгарликка тортишни сўради. Биз дарҳол жиноят иши очдик”, деди полиция ходими Дҳармендра Шукла.
Пайла оиласининг айтишича, Никки ва опаси 2016 йилдаги тўйларидан буён сеп ундириш мақсадида қийноққа солиб келинган. Улар аввалроқ Бҳати оиласига Scorpio русумли автомобиль, Royal Энfield мототцикли ва тилла тақинчоқлар ҳадя қилган.
Статистикага кўра, 2017/22 йиллар оралиғида ҳар йили ўртача 7000 та ўлим ҳолати қайд этилиб, уларнинг барчасида сеп можароси асосий мавзу бўлган. Аммо ҳақиқий рақамлар бундан ҳам юқори бўлиши мумкин, чунки кўплаб ҳолатлар расмий органларга етиб бормайди.
Изоҳ (0)