Хилма-хил ва мазали таомлар тайёрлаш ва уларни дид билан дастурхонга тортиш барчанинг ҳам қўлидан келавермайди. Бугунги қаҳрамонлар эса ўзининг мураккаб ва узоқ вақтни оладиган карьерасига қарамай, яқинларини хурсанд қилиш учун ошхонага шошилади. Қуйида пазандачиликда ҳам катта маҳоратга эга ҳинд кино юлдузлари ҳақида сўзлашамиз.
Дипика Падуконе
Дипика Падуконе ҳинд миллий таомларини, айниқса доса ва бошқа Жанубий Ҳиндистон деликатесларини тайёрлашни яхши кўради. Коронавирус пандемияси пайтида актриса мунтазам ошпазлик тажрибалари билан Instagramъдаги мухлислари билан ўртоқлашган. 2020 йилда Падуконе кўплаб ажойиб таомларни, жумладан, кунжут-саримсоқли соус қўшилган таиландча салат, том ям шўрваси кабиларни маҳорат билан тайёрлади. Интервьюларидан бирида Дипика Жанубий Ҳиндистоннинг идли ва расам каби мазали таомларини пиширишни яхши кўришини айтган. Шунингдек, у турмуш ўртоғи Ранвир Сингҳ учун хамирли егуликлар тайёрлашни ёқтиради.
Шилпа Шетти
Шилпа Шетти Кундра фитнес ва пазандалик соҳасига қизиқиши билан ҳам машҳур. У тез-тез ўзининг овқат тайёрлаш тажрибаларини YouTube каналида ва Instagram саҳифасида мухлислар билан баҳам кўради. Шетти янги таомларни аввал фойдаланмаган турли ноёб маҳсулотлардан тайёрлашни ёқтиради. Айниқса, болалар менюси ва газаклар мавзуси актриса учун энг қизиқарлидир.
Айшвария Рай Баччан
Болливуд ва Голливуднинг энг машҳур актрисаларидан бири ва дунё гўзали Айшвария Рай турли ширинликлар ва пишириқлар тайёрлашни хуш кўради. Ҳиндистон маҳаллий газетасига берган интервьюларидан бирида актриса барча оила аъзолари учун мангалор ошхонасига хос таомларни пиширишни айтиб ўтган.
Каришма Капур
90 йилларнинг машҳур ҳинд актрисаларидан бири Каришма Капур нафақат таниқли юлдуз, балки уйда оила аъзолари учун янги таомлар тайёрлашни яхши кўрадиган ва соғлом овқатланиш тарафдори бўлган ошпаздир. У қизи учун турли хамирли таомлар пиширишга доим вақт топади.
Малайка Арора
Болливуднинг яна бир машҳур юлдузи Малайка Арора ўғли туфайли пазандалик маҳоратини ўзлаштирган. Интервьюларидан бирида унинг ўғли бошқа оналар сингари Малайка ҳам уйда овқат пиширишни сўраганини айтган. Шу воқеадан кейин актриса кўпроқ уйда овқат қилишни бошлаган ва ўғлининг истагини амалга оширган.
Кангана Ранаут
Ҳинди фильмлари юлдузи Кангана таомлар тайёрлашга болалигидан қизиққан. Маълумотларга кўра, у Лондонда машҳур “Қиролича” фильмининг актёрлари ва жамоаси учун тез-тез тушлик тайёрлаган. Бўш вақтида Кангана турли сабзавотлар, кўкатлар ва зираворлардан пулао таомини пиширишни яхши кўради.
Алия Бҳатт
Алия Бҳаттнинг YouTube канали мавжуд, унда актриса турли рецептлар билан мухлисларини хушнуд этади. Соғлом ҳаёт тарзига фаол амал қилувчи юлдуз умуман шакар истеъмол қилмайди. У синглиси Шаҳин Бҳатт билан фойдали ва мазали ширинликлар тайёрлаган видеоларини тармоққа жойлайди.
Изоҳ (0)