Жаҳон соғлиқни сақлаш ташкилоти раҳбари Тедрос Аданом Гебрейесус Хитой расмийларидан коронавируснинг келиб чиқиши ҳақида қўшимча маълумот беришни талаб қилди. Бу ҳақда Financial Times хабар берди.
Гебрейесус ковид келиб чиқишини текшириш учун иккинчи делегацияни Хитойга юборишга тайёрлигини билдирди. Чунки Хитойнинг Ухан шаҳрида биринчи инфекция ҳолатларидан тўрт йил ўтиб ҳам вируснинг келиб чиқиши номаълумлигича қолмоқда.
“Хитойдан бу маълумотларга тўлиқ киришни таъминлашни ва бошқа мамлакатлардан икки томонлама учрашувлар чоғида бу масалани кўтаришни сўраймиз”, — деди Гебрейесус .
ЖССТ раҳбарининг баёноти коронавирус ҳолатлари кўпайганидан кейин вакциналарни янгилаш бўйича муҳокамалар чоғида эълон қилинди. Гарчи дунё энди пандемия хавфи остида бўлмаса-да, олимларнинг таъкидлашича, мамлакатлар вируснинг бошқа мутацияга учраган вариантлари устидан назоратни кучайтириши керак.
Ҳозирда COVID-19 нинг келиб чиқиши ҳақидаги иккита машҳур назария кўриб чиқилмоқда: вируснинг Ухандаги денгиз маҳсулотлари бозоридаги ҳайвонлардан одамга юқиши ёки маҳаллий лабораториядан сизиб чиқиши.
“Тез орада жавоб оламиз. Бу вақт масаласи”, — дея қўшимча қилди Гебрейесус .
COVID-19 эпидемияси биринчи марта 2019 йил декабрь ойида Хитойнинг Ухан шаҳрида қайд этилган. 2020 йил 30 январда ЖССТ ушбу эпидемияни халқаро аҳамиятга молик фавқулодда ҳолат, 2020 йил 11 мартда эса пандемия деб эълон қилинди.