Koronavirus yuqori ehtimol bilan laboratoriyadan sizib chiqishi oqibatida tarqalgan. AQSH kongressmenlari ikki yillik tekshiruv natijalarini bo‘yicha hisobot berdi.
Hujjat Vakillar palatasi Nazorat qo‘mitasining koronavirus bo‘yicha kichik qo‘mitasi tomonidan taqdim etilgan. Unda “COVID-19 virusi katta ehtimol bilan Xitoyning Uxan shahridagi laboratoriyadan kelib chiqqani” ta’kidlangan. Hujjat mualliflari buni isbotlash uchun beshta dalil keltirgan.
Unga ko‘ra, virus tabiatda aniqlanmagan biologik xususiyatlarga ega, COVID-19 ning barcha holatlarida virus inson organizmiga bir marta kirishi natijasida yuzaga kelgan. Garchi oldingi pandemiyalarda bir nechta tarqalish manbalari kuzatilgan.
Bundan tashqari, Uxanda SARS viruslarini o‘rganish bo‘yicha yetakchi tadqiqot laboratoriyasi mavjud. Kongressmenlar muassasa “biologik xavfsizlik darajasi yetarli bo‘lmagan” tadqiqotlar tarixiga egaligini aytmoqda.
Uxan virusologiya instituti tadqiqotchilari 2019-yil kuzida, COVID-19 yovvoyi hayvonlar bozorida aniqlanishidan bir necha oy oldin, COVIDga o‘xshash virus bilan kasallangan. Ilm-fanning barcha mezonlariga ko‘ra, agar tabiiy kelib chiqish haqidagi dalillar mavjud bo‘lganda, ular allaqachon ma’lum bo‘lar edi, deyiladi xulosada.
Olimlar esa koronavirus bozordan tarqalganini aytmoqda
AQSH, Buyuk Britaniya, Fransiya va boshqa mamlakatlardan bir guruh olimlar koronavirus tarqalishining manbayi Xitoyning Uxan shahridagi dengiz mahsulotlari bozori ekanini aytgandi. 12 milliondan ortiq aholiga ega Uxanda 4 ta tirik hayvonlar bozori faoliyat yuritadi. Ular orasida Xuanan bozori eng ko‘p yovvoyi hayvonlar sotiladigan joy hisoblanadi.
Olimlar bozorda 2019-yilning kuzida bir necha yenotsimon itlar, bambuk kalamushlar, malay jayralari, Amur tipratikanlari va Osiyo bo‘rsiqlari kabi tirik hayvonlarni noqonuniy sotilganini aytmoqda. Yovvoyi hayvon sotuvchilarning aksariyati bozorning g‘arbiy qismida joylashgan, aynan shu yerda COVID-19 bilan kasallanishning eng dastlabki va ko‘p holatlari kuzatilgan.
Bozordan olingan genetik material namunalari pandemiyaning umumiy ajdodiga genetik jihatdan mos kelgan. Koronavirus izlari hayvonlar saqlanadigan qafaslarda, ularni tashilgan aravalarda va kanalizatsiya kanallarida topilgan. JSST 2021-yildagi hisobotida aynan shu hayvonlar COVID-19 tarqalishining eng ehtimoliy manbalaridan biri bo‘lishi mumkinligini ta’kidlagandi.
Izoh (0)