Соғлиқни сақлаш ходимлари Хитойда номаълум касаллик ҳолатлари кўпайганини текширмоқда, болалар пневмония билан касалхонага ётқизилмоқда. Бу ҳақда New Scientist хабар берди.
Хитойда номаълум пневмония тарқалаётгани бўйича нималар маълум?
Хитойда болаларнинг маҳаллий касалхоналарга ётқизилиши тез суръатлар билан ортиб бормоқда. Ҳозирча номаълум патоген сабаб бўлган пневмония эпидемияси бутун мамлакат шаҳарларига, жумладан Пекинга ҳам тарқалган.
Хитойнинг сўғлиқ бўйича муаммоси ҳақида бутун дунё бўйлаб одамлар ва ҳайвонлар касалликларининг тарқалишини кузатувчи ProMed жамоатчилик назорати тизими хабар берди. У биринчилардан бўлиб болалардаги “ташҳис қўйилмаган пневмония” эпидемиясини аниқлади ва батафсил тавсифлади.
ProMed 22 ноябрь куни янги огоҳлантириш эълон қилди. Пойтахт Пекин ва Ляонин провинциясидаги шифохоналарда пневмониядан азият чекаётган болалар оқими кузатилаётгани айтилди.
“Кўп одамлар касалхонага ётқизилган, ҳақиқатан ҳам жуда кўп. Уларда йўтал ёки ҳеч қандай аломат йўқ. Уларда шунчаки ҳарорат кўтарилган ва уларнинг кўпчилигининг ўпкаларида тугунлар пайдо бўлмоқда”, — дейди Пекин аҳолисидан бири.
“Ҳисоботда гап аниқланмаган респиратор касалликнинг кенг тарқалган эпидемияси ҳақида кетаётганини билдиради. Эпидемия қачон бошлангани умуман аниқ эмас, чунки жуда кўп болалар тез касал бўлаётгани одатий ҳол эмас”, —дейди ProMed муҳаррири.
Ҳисоботда катталар касаллангани айтилмаган. Айнан ProMed 2019 йил декабрь ойи охирида сирли вирус ҳақида огоҳлантирган ва кейинчалик у Sars-Cov-2 номини олганди.
Касалликнинг манбаи нима?
Ташкилот ҳисоботида қайд этилишича, касаллик бактериал, вирусли ёки бошқа сабаблар билан боғлиқми, ҳозирча аниқ эмас. Касалликнинг сабаби ва даражасини аниқлаш учун қўшимча маълумот керак.
Касалликнинг тарқалиши Mycoplasma pneumoniae бактерияси билан боғлиқ бўлиши мумкин. Бошқа давлатлар, шу жумладан Буюк Британия ва АҚШ, Чехия ҳам пандемия чекловлари олиб ташланганидан кейин РСВ ва грипп каби касалликларнинг ўсишини кузатди.
Пекин болалар касалхонасининг амбулатория бўлими директори бир ой олдин худди шу муаммолар ҳақида гапириб, China Voice’га унинг касалхонаси бу йил ҳам болаларнинг нафас олиш касалликлари билан курашаётганини айтганди.
Хитой ЖССТнинг маълумотларни алмашиш чақириғига қандай жавоб берди?
ЖССТ сўровига кўра, Хитойнинг Sinxua давлат ахборот агентлиги Хитой Миллий соғлиқни сақлаш комиссияси (NHC) расмийларига иқтибос келтирган ҳолда, улар нафас йўллари касалликлари билан оғриган болаларни ташхислаш ва даволашга жиддий эътибор қаратилаётгани ҳақида мақола чоп этди.
Кейинчалик ЖССТ Хитойда “ғайриоддий ёки янги патогенлар” аниқланмаганини ва мамлакат шимолида тарқаладиган нафас олиш касалликларининг кўпайишига “бир нечта маълум патогенлар” сабаб бўлганини билдирди.
Мутахассислар ваҳима қилмасликка чақирмоқда
ЖССТга коронавирус бўйича маслаҳат берадиган олимлар болалардаги номаълум пневмония бўйича кўплаб маълумот тўпланишини кутишга чақирди.
Охир-оқибат ривожланаётган патогенлар сонини ҳисобга олсак, дунё, албатта, қандайдир инфекциядан келиб чиққан яна бир пандемияни бошдан кечиради. Аммо, Хитойда бундай ҳолатлар янги патоген сабаб келиб чиққан бўлса, унда катталар ҳам касал бўлиши керак эди.
“Мен ҳозирда билган нарсаларимизга асосланиб, пандемия ҳақида ваҳима тугмасини босмоқчи эмасман, лекин ЖССТнинг Хитойдан жавобини ва ЖССТнинг кейинги баҳолашини кўриш менга жуда қизиқ”, — деди ЖССТга пандемия бўйича маслаҳат берган соғлиқни сақлаш мутахассиси Брайан Макклоски.
Изоҳ (0)