Британияда чой тақчиллиги туфайли ваҳима бошланди. Одамлар дўкон жавонларида қолган қуруқ чойларни захиралаш учун сотиб олмоқда, чунки импорт билан боғлиқ оғир вазият туфайли етказиб беришда узилишлар бўлиши кутилмоқда.
Савдо шохобчалари раҳбарлари чой устида жанжаллар бошланишидан қўрқмоқда. Коронавирус пандемияси даврида британияликлар ҳожатхона қоғозини талашиб дўконларда жанжаллар уюштирган эди.
Буюк Британиянинг энг йирик чой етказиб берувчи компанияларидан бири таъминотни ҳар куни кузатиб боришини айтди, чунки импорт ҳозирда "оғир вазиятда" ва жиддий равишда чекланган. Осиё, Шарқий Африка, Хитой, Ҳиндистон, Шри-Ланка ва Кениядаги ишлаб чиқарувчиларнинг чой етказиб беришлари Қизил денгиздаги ҳусийлар ҳужумлари туфайли тўхтаб қолган. Юк кемаларининг Сувайш канали орқали Европага ўтишида тўсқинлик юзага келмоқда.
Импорт қилувчи давлатлар декабрь ойида ушбу сценарийга тайёргарлик кўришни бошлаганига қарамай, ҳозирги пайтда вазият кутилганидан анча ёмонроқ. Буюк Британияга чой етказиб берувчи компанияларнинг таъкидлашича, дефицит юзага келишидан қўрқув туфайли одамлар одатдагидан кўпроқ чой сотиб олишни бошлаган. Бундай вазиятда, жавонлар бўшаб қолиши табиий ҳол.
Аммо баъзи дўконларда аллақачон бўш жавонлар мавжуд ва етказиб бериш муаммолари ҳақида эълонлар жойлаштирилган, бу эса британияликлар орасида янада кўпроқ ваҳима уйғотган. Статистик маълумотларга кўра, Буюк Британияда ҳар куни тахминан 100 миллион финжон чой ичилади, деб ёзади Daily Star.
Изоҳ (0)