Xitoylik virusologlar ko‘rshapalaklarda COVID-19 kabi odamlarga yuqishi mumkin bo‘lgan yangi koronavirus turini aniqladi. Bu haqda South China Morning Post xabar berdi.
Ta’kidlanishicha, ushbu virus HKU5 koronavirusining yangi turi bo‘lib, dastlab Gonkongdagi yapon ko‘rshapalagida topilgan. Xitoy Fanlar akademiyasining Guanchjoudagi bo‘limi, Uxan universiteti va Uxan virusologiya instituti mutaxassislari Guanchjoudagi laboratoriyada tadqiqot olib borgan.
Virusologlar ko‘rshapalak namunalaridan ajratib olingan yangi virus inson hujayralarini zararlashi mumkinligini ta’kidlamoqda.
Olimlar hozircha xavotirlanishga sabab yo‘qligini bildirgan. HKU5-CoV-2 ning odamlar orasida tarqalish xavfini bo‘rttirib ko‘rsatmaslik kerak, biroq bu borada yanada chuqurroq tadqiqotlar o‘tkazish zarur, deydi ular.
AQSH kongressmenlari COVID-19 Uxandagi laboratoriyada yaratilganini aytdi
Ular 2 yillik tekshiruv natijasida koronavirus laboratoriyadan tarqalganiga oid dalillar keltirdi. Virus biologik xususiyatlarga ega, COVID bozorda tarqalishidan oldin laboratoriya xodimlari kasallikka chalingan, deydi kongressmenlar.
Ularga ko‘ra, virus tabiatda aniqlanmagan biologik xususiyatlarga ega, COVID-19 ning barcha holatlarida virus inson organizmiga bir marta kirishi natijasida yuzaga kelgan. Garchi oldingi pandemiyalarda bir nechta tarqalish manbalari kuzatilgan.
Bundan tashqari, Uxanda SARS viruslarini o‘rganish bo‘yicha yetakchi tadqiqot laboratoriyasi mavjud. Kongressmenlar muassasa “biologik xavfsizlik darajasi yetarli bo‘lmagan” tadqiqotlar tarixiga egaligini aytmoqda.
Olimlar esa koronavirus bozordan tarqalganini aytmoqda
AQSH, Buyuk Britaniya, Fransiya va boshqa mamlakatlardan bir guruh olimlar koronavirus tarqalishining manbayi Xitoyning Uxan shahridagi dengiz mahsulotlari bozori ekanini aytgandi. 12 milliondan ortiq aholiga ega Uxanda 4 ta tirik hayvonlar bozori faoliyat yuritadi. Ular orasida Xuanan bozori eng ko‘p yovvoyi hayvonlar sotiladigan joy hisoblanadi.
Olimlar bozorda 2019-yilning kuzida bir necha yenotsimon itlar, bambuk kalamushlar, malay jayralari, Amur tipratikanlari va Osiyo bo‘rsiqlari kabi tirik hayvonlarni noqonuniy sotilganini aytmoqda. Yovvoyi hayvon sotuvchilarning aksariyati bozorning g‘arbiy qismida joylashgan, aynan shu yerda COVID-19 bilan kasallanishning eng dastlabki va ko‘p holatlari kuzatilgan.
Izoh (0)