БМТнинг Иқтисодий ва ижтимоий масалалар бўйича департаменти ҳисоботига кўра, XXI асрнинг 80 йилларига келиб дунё аҳолиси максимал даражага етади.
“Дунё аҳолиси яна 50-60 йил ўсишда давом этиши кутилмоқда, 2080 йилларнинг ўрталарига келиб тахминан 10,3 миллиардга етади. Ҳозир 2024 йилда бу кўрсаткич 8,2 миллиардни ташкил этади. Аҳоли сонининг энг юқори чўққисига эришилгандан кейин унинг қисқариши, яъни аср охирига келиб 10,2 миллиард кишига тушиши кузатилади”, дейди ҳисобот муаллифлари.
БМТ маълумотларига кўра, ҳозирда дунё аҳолисининг тўртдан бир қисми аҳолиси энг юқори кўрсаткичларга эришган мамлакатларда — Хитой, Германия, Япония ва Россияда истиқомат қилади. Мутахассисларнинг фикрича, аср охирига келиб Хитой, Япония ва Россияда аҳоли сони энг кўп қисқаради.
“Ҳозирда сайёрамизда ўртача умр кўриш 73,3 ёшни ташкил этади – у аллақачон коронавирус пандемиясигача бўлган даражага қайтган”, дея қайд этади ҳисобот муаллифлари.
Таҳлилчиларга кўра, 2054 йилга бориб ўртача умр кўриш ёши 77,4 ёшга етади.
“2080 йилга бориб, 65 ёшдан ошганлар сони 18 ёшгача бўлганларникидан кўп бўлади. 2070 йилларнинг охирига келиб, қариялар сони 2,2 миллиардга етади”, дейилади ҳисоботда.
Бирлашган Миллатлар Ташкилоти аҳолиси энг тез қариётган мамлакатларни ўз фуқароларининг меҳнат қобилиятини ошириш, шу жумладан, узлуксиз ўқитиш, қайта тайёрлаш ва меҳнат муддатини узайтириш бўйича чоралар ҳақида ўйлашга чақирган.
Изоҳ (0)