Ўзбекистонда тадбиркорлик қилиш мураккабми ёки осон? Солиқ, лицензиялаш, банк ва бошқа соҳалар тадбиркорга қанчалик кўмакдош? Шу ва бошқа саволларга жавоб олиш мақсадида “Дарё” мухбири “Шуҳрат” медали соҳибаси, тадбиркор Нигора Муротова билан суҳбатлашди.
Нигора опа, 20 август – Тадбиркорлар куни муносабати билан “Шуҳрат” медали билан тақдирландингиз. Албатта, бу фаолиятингизда яхши натижалар кўплигидан дарак беради. Дастлаб нега тадбиркорлик соҳасини танлаганингиз ва фаолиятингиз қандай бошлангани ҳақида гапирсангиз?
Шу йил Тадбиркорлар кунига аёл тадбиркорлар қаторида 44 та тақдирланганлар ичида менинг ҳам исм-шарифим бўлиши жуда қувонарли. Нафақат мен учун, балки жамоам, оилам учун ҳам. Иш фаолиятимиз бошланганига 6 йил бўлди ва ҳозирда ўрта бизнес вакилимиз.
Тадбиркорлигим ёшлигимдан бошланган. Асли касбим шифокор, хотин-қизлар гинекологиман. Илмий иш ҳам қилганман. Ҳар доим қўшимча манба ҳисоблаб тадбиркорлик билан шуғулланиб келаман. Айтмоқчиманки, хусусий тиббий клиникаларни очиш бирданига бўлиб қолмаган. Кичик бизнесдан ўрта бизнесга ўтиш жараёни 20–25 йил давом этган.
Клиникамиз “Никамед” 2017 йил апрелда фаолият бошлади. Албатта, бошланишида осон бўлмаган, анча қийинчиликларни бошдан ўтказдик.
Клиникамиз кичик лицензия ва 36 та ётоқхонаси билан очилган. Президентимиз Яшнобод туманига ташриф буюрганларида туман аҳолисини ижтимоий-иқтисодий ҳолатини яхшилаш дастурига биз ҳам киритилиб, дастур доирасида 1 миллиард сўм имтиёзли кредит олганмиз.
Шифохона очишдан асосий мақсадим Ўзбекистон фуқароларини соғломлаштириш, уларда касалини даволашдан аввал профилактик ишлар олиб бориш, яъни касалликнинг олдини олишдан иборат. Фуқаролари умри узоқ бўлган давлатлар қаторида Ўзбекистонни ҳам кўришни истайман. Дунёда аҳолисининг ўрта умр кўриш ёши бўйича рейтинг бор. Афсуски, биз унда анча орқадамиз. Чунки биз даволаймиз, лекин касалликнинг олдини оладиган профилактик чора-тадбирларни эса жуда кам кўрамиз.
Ҳозирда клиникамизнинг иккита филиали бўлиб, уларда 150–160 нафар ходим ишлайди. Яна 2 та филиал очишга ҳаракат қиляпмиз.
Тадбиркорнинг ўй-хаёли фақат ривожланишда бўлиши керак. Агар у эртага менга текширув келади, солиқ нима бўлди деб, қўрқиб яшаса, ҳеч қачон ўса олмайди. Бизга президент “орқангизда мен турибман”, деб айтдилар. “Иккита иш ўрни яратган тадбиркорни елкамда кўтараман”, дедилар. Бу гапларни эшитгач, руҳланиб, албатта ўсасиз.
Ўзбекистонда бизнес қилиш қанчалик мураккаб ёки осон? Солиқ, банк, лицензиялаш ва бошқа соҳалар вакиллари тадбиркорлар билан доимий мулоқотда бўлади. Уларнинг фаолиятига қандай баҳо берасиз?
Сўнгги вақтларда солиқ тизимида ҳам, банк тизимида ҳам, саноат палатасида ҳам тадбиркорлар учун кўп имкониятлар яратилди. Улар юқоридан пастга тушиб, сени муаммойинг нима, қандай қийинчиликларинг бор, деб сўраганларининг ўзида ҳукуматга ишонч янада ошиб, мотивация олдик.
Бугун лойиҳавий таклифларни олдим. Давлат тадбиркорларга лойиҳаларни беряпти. “Мана ол, 60 гектаргача лойиҳанинг кредити, молиялаштирилиши, бизнес режаси”, деб беряпти. Олинг, қилинг. Йўл ёпиқ эмас, очиқ. Фақат ишлаш керак. Озгина билимимизни оширишимиз лозим. Қайси соҳада бўлишидан қатъи назар, ҳамма ўз устида ишлаши керак.
Ҳозирда Тожикистон ва Қозоғистоннинг минглаб фуқаролари чегарадан ўтиб, келиб бизда даволанмоқда. Масалан, клиникамизда 64 та койка бўлса, 30 фоизи Тожикистон ҳамда Қозоғистон фуқаролари. Нима учун? Тожикистон ёки Қозоғистонда шифохоналар йўқми? Бор. Лекин бизда шифокорлар малакалироқ, кўпроқ ўз устимизда ишлаймиз. Европа, жаҳон мамлакатлари стандартларига яқинлашишга ҳаракат қиламиз. Айтмоқчиманки, биз ўша даражага етдик. Чунки мен ўзим Ҳиндистон, Хитой, Америка, Европа давлатларидаги хусусий тиббиёт клиникаларига бориб келаман. Биз аллақачон ўша даражага етиб келдик. Ўзбекистонга дунё стандартларига жавоб берадиган ускуналарни олиб киряпмиз.
2020 йил март ойида Ўзбекистонга коронавирус кириб келиши, пандемия даври кўп тадбиркорлар фаолиятига жиддий таъсир қилди. Ўша пайтда эслаймизки, мамлакатда илк коронавирус сизда аниқланганди. Шундан сўнг айрим юртдошларимиз сизга нисбатан танқидий фикрлар билдирган. Ҳаттоки коронавирус Ўзбекистонда тарқалишига сизни сабабчи қилиб кўрсатмоқчи бўлганлар ҳам топиларди. Сизга атрофда кўп босимлар бўлгани ҳақида эшитганмиз. Шундай оғир босимларни қандай енгиб ўтдингиз, пандемия фаолиятингизга қандай таъсир қилди?
Инсон ҳаётда кўп синовларга дуч келади. Қийинчиликларни бошдан ўтказади. Бу синовлар албатта унга тайёр бўлган, у синовлардан ўта оладиган инсонларга бериларкан. Бу ҳақда эслашни ҳам, гапиришни ҳам хоҳламайман. Лекин бир гапни айтмоқчиман, қалбимизда борини “комментарий”да кўрсатамиз, қалбимизда борини инсонларга тарқатамиз. Қалбимизда самимият, оқкўнгиллик бўлса, биз атрофимиздагиларга шу энергияни берамиз. Қалбимизда кирлик, манмансираш ва кибр бўлса, кимдир йиқилган даврда уни тепкилаймиз, устидан куламиз. Интернетда танқидий ёзилган фикрлар ёнида, далда берадиган гаплар айтган таниш ва нотаниш инсонларнинг кўплиги менга куч берди.
Ўшанда фаолиятимизни 52 кундан кейин бошладик. У пайтда бизнинг давлатга ёрдамимиз керак эди. Коронавирус ўша йили ёзда авжига чиққанди. Биз ҳеч қанақа гина-кудурат қилмасдан, ўзимизда куч топиб фуқароларимизга жуда ҳам кўп ёрдам бердик. Ўша пайтда беморларни “коридорлар”гача ётқизишга мажбур бўлганмиз. Ётоқларимиз шу даражада тўлиб кетганди. Чунки биздан Соғлиқни сақлаш вазирлиги томонидан илтимос қилинганди. Давлат касалхоналари бу “нагрузка”ни кўтара олмаётганди, шунинг учун хусусий секторга ҳам беморларни даволаш имконияти берилган. Шу фурсатдан фойдаланиб жамоамиз шифокорларига раҳмат айтаман. Уларнинг синовли кунларда қўллаганини қадрлайман.
Изоҳ (0)