Мўйноқдан отилиб чиққан катта босимдаги газ қудуғи муваффақиятли “жиловланди”. Бу ҳақда 26 август куни “Ўзбекнефтгаз” АЖ матбуот хизмати хабар берди.
26 июль куни Қорақалпоғистон Республикаси, Мўйноқ майдонидаги “Ўзбекнефтгаз” АЖга қарашли янги, лойиҳавий чуқурлиги 5000 метр бўлган 1-сон излов қудуғида чуқурлиги 4707 метр бурғиланганда тўсатдан газ отилиб чиққанди.
Компания ахборотида қайд этилишича, содир бўлган газ отқинини бартараф этиш учун “Ўзбекнефтгаз” АЖ томонидан кеча-ю кундуз иш олиб борувчи тезкор штаб ташкил қилиниб, таркибига Ўзбекистон очиқ фаввораларни олдини олиш ва бартараф этиш бўйича харбийлаштирилган қисм, Фавқулодда вазиятлар вазирлиги ва бошқа масъул мутасадди ташкилотларнинг ҳудудий бошқармалари ҳамда маҳаллий ҳокимликнинг мутахассислари жалб қилинди.
Махсус штаб томонидан газ отқинини бартараф этишга қаратилган тезкор “йўл харитаси” ишлаб чиқилди ва ишлар босқичма-босқич ҳамкор ташкилотлар кўмагида амалга оширилди.
“Қудуқ турли бахтсиз ҳодисалар, талафотларсиз жиловланди”, дейилади “Ўзбекнефтгаз” АЖ хабарида.
Бугунги кун ҳолатига кўра, “йўл харитаси”даги барча ишлар малакали маҳаллий мутахассисларнинг машаққатли ва самарали меҳнати, халқаро тажрибага эга ҳамкор компаниялар вакиллари ҳамда махсус техника воситалари ёрдамида муваффақиятли бажарилиб, қудуқни бошқариш имкони яратилди.
“Мураккаб шароитдаги қудуқни ёпиш ишларида кўрсатган ғайрат ва шижоати, оловли майдондаги ўта оғир ва машаққатли меҳнати учун 200 нафар ишчига ташаккурнома ва эсдалик совғалари топширилди”, дейилади компания хабарида.
Энергетика вазирлиги ҳодиса содир бўлган куни ушбу қудуқ аҳоли яшаш жойидан узоқда жойлашгани ва газ таркибида олтингугурт йўқ бўлган тоза метан ҳисобланишини маълум қилганди.
Изоҳ (0)