Футбол мураббийси бўлиш жуда оғир. Айниқса, терма жамоаларни бошқарадиган мураббийлар жудда кучли босим остида ишлайди. Бразилияда қанча аҳоли бўлса, шунча футбол мураббийси бор, деган ҳазиломуз ибора бежиз айтилмаган.
Доимо босим остида ишлаш эса соғлиққа жиддий зарар келтириши аниқ. Албатта, соғлиқни ёмонлаштирадиган кўплаб омиллар бор: палапартиш турмуш тарзи, нотўғри овқатланиш, спиртли ичимликлар ҳамда тамакига ружу қўйиш ва ҳоказо.
Шундай бўлса-да, асаб тизимининг бузилиши барча касалликлар “онаси” экани ҳеч кимга сир эмас. Мураббийларда эса биринчи бўлиб ишдан чиқадигани бу — асаб.
Ўзбекистон миллий терма жамоаси бош мураббийси Сречко Катанец ҳам анчадан бери соғлиғидаги муаммолардан азият чекиб келмоқда. Бугун, 20 январдан миллий терма жамоа Қатарда йиғин бошлади. Аммо бу йиғинга Катанец кела олмаслиги хабар қилинди.
Бу биринчиси эмас. Катанец 3 йил олдинги БАА йиғинини ҳам коронавирус сабаб ўтказиб юборганди. Бундан ташқари, соғлиғидаги муаммолар сабабли мураббий энг муҳим баҳслар давомида 3 бор жамоага ёрдам бера олмаган.
Катанец Туркманистон билан ўйин олдидан жамоани учинчи бор тарк этса, қайтиб келмаслигини айтганди. Аммо 2026 йилги Жаҳон чемпионати Осиё минтақасидаги 3-саралаш босқичидан ўрин олган учрашувларнинг энг муҳими — Эрон ва БАА терма жамоаларига қарши учрашувларда терма жамоага кела олмаган.
Жаҳон футболида ҳам бир қатор мураббийлар соғлиғидаги муаммоларга дуч келган, аммо мураббийлик фаолиятидан воз кечмаган. "Дарё" қуйида ана шундай мураббийларнинг баъзилари ҳақида маълумотларни жамлади.
Оскар Табарес
Давлат: Уругвай
Охирги иш жойи: Уругвай терма жамоаси
Оскар Табаресга 2013 йилда Гиена-Барре синдроми ташхиси қўйилган. Бу одамни бутунлай фалаж қиладиган неврологик касаллик. Аммо бу ташхис билан Табарез 2021 йил охиригача Уругвай терма жамоасида ишлади.
Мустақил ҳаракатлана олмагани туфайли у машғулотлар ва учрашувларга қўлтиқтаёқда келишга мажбур бўлган. Федерация Табаресга махсус миникар ясаттириб берган. У ҳазиллашиб машинасини "Ferrari" деб аташни яхши кўрган.
Эдуардо Бериссо
Давлат: Аргентина.
Иш жойи: "Леон" жамоаси.
2017 йилнинг ноябрида “Севилья” бош мураббийи Эдуардо Бериссода простата саратони аниқланган эди. У ўз лавозимида қолди, аммо қониқарсиз натижалар туфайли ишдан бўшатилди.
Кейин аргентиналик бир қатор даволаниш муолажаларини бошдан кечирди ва тез орада касаллик устидан ғалаба қозонганини эълон қилди. 2019 йилдан бери Бериссо Бильбаонинг “Атлетик” клуби, Парагвай ва Чили терма жамоаларида ишлашга улгурди. Ҳозирда у Мексиканинг "Леон" терма жамоасида ишламоқда.
Хоакин Каппарос
Мамлакат: Испания.
Охирги иш жойи: Арманистон терма жамоаси
"Севилья" бош мураббийи Хоакин Каппаросга 2019 йилда лейкемия (оққон) ташхиси қўйилган эди. Аммо бу унинг мавсум охиригача жамоада ишлашига, қисқа вақтдан сўнг Арманистон терма жамоасини бошқаришига тўсқинлик қилмади.
Каппарос 2022 йилнинг сентябрида федерация билан ўзаро келишув асосида Арманистон терма жамоасини тарк этган.
Клас Ингессон
Давлат: Швеция
Охирги иш жойи: "Эльфсборг" клуби
90 йилларда футбол томоша қилган мухлислар "шафқатсиз" деб ном олган швед ярим ҳимоячисини яхши эслашса керак. Футболчилик фаолиятини тугатгандан сўнг, Клас Ингессонга миелома (суяк илиги ҳужайраларининг шикастланиши) ташхиси қўйилди. Даволаниш муваффақиятли ўтиб, Ингессон "Эльфсборг" ёшлар жамоасига устозлик қила бошлади.
2012 йилнинг декабрида у асосий жамоага раҳбарлик қилди. Аммо бир-икки ой ўтгач, унинг касали қайта қўзиди. Клас бир пайтлар футбол майдонида бўлгани каби охиригача курашди ва ногиронлар аравачасида бўлса ҳам машғулотларни ўтказди.
Афсуски, касаллик кучлироқ бўлиб чиқди. 2014 йил 29 октябрда Клас Ингессон мураббийлик фаолиятини давом эттираётиб вафот этди.
Томмазо Маэстрелли
Мамлакат: Италия.
Охирги иш жойи: "Лацио"
Маэстрелли ўз вақтида кучли футболчи бўлган, ҳатто Италия терма жамоасида битта ўйин ўтказган. Футболчилик фаолиятини якунлаб, мураббий сифатида ишлаган.
1971 йилда 51 ёшида “Лацио” бош мураббийлигига тайинланган. Ўша вақтда бу мухлислар ва бир қатор ўйинчиларнинг норозилигига сабаб бўлди, чунки футболчи Маэстрелли уч йил давомида "Рома"да ўйнаган ва ҳатто "бўрилар" сардори бўлганди.
Аммо 1973-1974 йилги мавсумда "Лацио" тарихидаги илк скудеттони қўлга киритгач, ҳамма тинчланди. Кейинги йили римликлар ҳам чемпионлик учун курашдилар, бироқ уларнинг мураббийи жигар саратони ташхиси билан касалхонага ётқизилганидан кейин таслим бўлишди.
1975-1976 йилги мавсумда Маэстрелли мураббийлик лавозимига қайтди, аммо тез орада соғлиғи сабабли спорт директори лавозимига ўтди. У 1976 йил 2 декабрда вафот этган.
Тито Виланова
Мамлакат: Испания
Охирги иш жойи: "Барселона" клуби
Тито Виланова узоқ вақт давомида Хосеп Гвардиоланинг ёрдамчиси бўлиб, аввалига иккинчи, кейин эса "Барселона"нинг асосий жамоасида ишлаган. Пеп кетганидан кейин 2012-2013 йилги мавсумда Тито бош мураббий бўлганди.
У "Реал"дан 15 очко олдинлаб кетиб, "Барса" билан чемпионликни қўлга киритди. Аммо мавсум охирида соғлиғи сабабли фаолиятини якунлади. Виланова саратондан азият чекди ва бир нечта операцияларни ўтказди. У 2014 йил 24 апрелда 45 ёшида вафот этган.
Синиша Михайлович
Давлат: Сербия
Охирги иш жойи: "Болонья" клуби
Футбол тарихидаги энг яхши жарима зарбалари ижрочиларидан бири Синиша Михайлович Италиянинг бир қатор клублари, Лиссабоннинг "Спортинг" ва Сербия терма жамоаси билан ишлаган. 2019 йилда Михайловичга даҳшатли ташхис қўйилди: лейкемия (оққон).
Табиатан жангчи бўлган Синиша мураббийлик фаолиятини тарк этмади (ўшанда у "Болонья"ни бошқараётганди). Аммо 2022 йил сентябрида у барибир касалликка таслим бўлди. Михайлович клуб билан шартномасини бекор қилди, икки ойдан кейин эса 53 ёшда бу дунёни тарк этди.
Свен-Ёран Эрикссон
Давлат: Швеция
Охирги иш жойи: Филиппин терма жамоаси
Футболчи сифатида номдор клубларда тўп тепманаган бўлса ҳам, Эрикссон мураббий сифатида анча машҳурликка эришди. У Швециянинг “Гётебург”, Португалиянинг “Бенфика” клубларида, шунингдек, Италиянинг "Рома", "Фиорентина", "Latsio" каби бир қатор жамоаларида ишлаган.
Англия терма жамоасидаги фаолияти эса уни топ мураббийлар қаторидан жой олишига сабабчи бўлган. Дарвоқе, Эрикссон Англия терма жамоаси тарихидаги биринчи хорижлик мураббий ҳисобланади.
2024 йил январь ойида Эрикссон ошқозон ости бези саратонининг 4-босқичи касаллигини бошдан кечираётганини эълон қилди. Шу йилнинг 26 августда 77 ёшида вафот этди.
Изоҳ (0)