Исроил мудофаа вазири Исроил Кац Исроил армиясига Ғазо аҳолисига Фаластин ҳудудини ихтиёрий равишда тарк этиш ва уларни қабул қилишга тайёр бўлган исталган мамлакатга жўнаб кетиш имконини берувчи режа ишлаб чиқишни топширди.
Режа чегара ўтиш пунктларидан чиқиш имкониятларини, шунингдек, денгиз ва ҳаво йўналишлари учун махсус механизмларни ўз ичига олади, деб ёзди Кац Х ижтимоий тармоғида.
Кац АҚШ президенти Дональд Трампнинг Ғазо сектори аҳолисига уни тарк этиш имкониятини берувчи “дадил ташаббуси”ни олқишлади. Унинг сўзларига кўра, мазкур ташаббус Ғазо аҳолисига “кенг имкониятлар” тақдим этиши, уларга қабул қилувчи мамлакатларга кўчишда ёрдам бериши ва ҲАМАС кетганидан сўнг “хавф туғдирмайдиган қуролсизлантирилган Ғазони тиклаш” режаларини амалга оширишга кўмаклашиши мумкин. Бироқ, у мазкур жараён кўп йиллар талаб қилишини таъкидлади.
Вазирга кўра, ҲАМАС “Ғазо аҳолисидан жонли қалқон сифатида фойдаланган ва террор инфратузилмасини қурган”.
Ҳозирда эса ҲАМАС уларни гуманитар ёрдам тизими орқали пул ундириш ва кетишларига тўсқинлик қилиш йўли билан гаровда ушлаб турибди. Ғазо аҳолиси бутун дунёдаги каби эркин ҳаракатланиш ва миграция ҳуқуқига эга бўлиши керак, дея қўшимча қилди у.
Кацнинг фикрича, фаластинликлар кўчиб ўтиши мумкин бўлган мамлакатлар қаторига Испания, Ирландия, Норвегия ва Исроилнинг Ғазо секторидаги ҳаракатлари юзасидан унга қарши “ёлғон айбловлар қўйган” бошқа давлатлар киради. У бу давлатлар ушбу минтақа аҳолисини қабул қилишга қонунан мажбур эканлигини, акс ҳолда уларнинг “иккиюзламачилиги фош бўлишини” таъкидлади. Кац, шунингдек, тартибли иммиграция дастурига эга бўлган ва илгари Ғазо сектори аҳолисини қабул қилишга тайёрлигини билдирган Канадани ҳам тилга олди.
Трамп: “АҚШ Ғазо секторини бошқаради”
АҚШ президенти Ғазо секторини “снос” майдончаси деб атаганди. У анклав аҳолисини турли мамлакатларга, жумладан, Иордания ва Мисрга кўчириб ўтказиш мумкинлигини айтган. У Қўшма Штатлар бу жараённи молиялаштирмаслиги, чунки харажатларни қоплашга Яқин Шарқ давлатларининг қурби етишини таъкидлаганди. Вашингтон эса минтақадаги ишлар учун жавобгар бўлади ва зарурат туғилганда у ерга ўз қўшинларини юбориши мумкинлигини айтган.
Саудия Арабистони ҳукумати ўз баёнотида фаластинликларни ўз ерларидан сиқиб чиқаришга қаратилган ҳар қандай уринишларни қабул қилмаслигини таъкидлаб, Фаластин давлати тузилмагунича Исроил билан муносабат ўрнатмаслигини эълон қилди.
ҲАМАС Трампнинг Ғазодаги фаластинликларни чиқариб юборишга чақирган даъватларини қоралаб, уларни “ўз еридан қувиш” деб атади.
Австралиянинг маҳаллий аҳолиси вакили бўлган сиёсатчи Лидия Торп Трампнинг Ғазони “эгаллаш” ҳақидаги фикрларини “этник тозалаш ва мустамлакачиликнинг очиқ чақириғи” деб баҳолади.
Амнестй International инсон ҳуқуқлари ташкилоти ўтган йилнинг ноябрь ойида Халқаро жиноий суд (ХЖС) Нетаньяхуни қамоққа олиш учун ордер берган бўлса-да, уни қамоққа олмасдан, АҚШ “халқаро одил судловга нисбатан нафратини намойиш этаётганини” билдирди.
АҚШда бир қатор демократлар Трампнинг режасини танқид қилди, демократ сенатор Крис Мерфи эса АҚШнинг Ғазога бостириб кириши минглаб америкалик аскарларнинг ҳалок бўлишига ва Яқин Шарқда ўн йиллаб давом этадиган урушга олиб келишини таъкидлади.
Изоҳ (0)