Россия президент Владимир Путин ҳамда Дональд Трампнинг эҳтимолий учрашуви учун Саудия Арабистони ва БААни музокаралар майдони сифатида кўриб чиқилмоқда, деб ёзади Reuters икки рус манбасига таяниб.
Агентлик суҳбатдошларига кўра, сўнгги ҳафталарда россиялик юқори мартабали амалдорлар Саудия Арабистони ва БААга ташриф буюрган. Бироқ, манбалардан бирига кўра, бу ғояга “баъзи қаршиликлар” мавжуд, чунки Саудия Арабистони ҳам, БАА ҳам АҚШ билан яқин ҳарбий ва хавфсизлик алоқаларига эга.
2022 йил март ойида Россия ва Украина ўртасидаги биринчи музокаралар ўтказилган Туркия бу босқичда эҳтимолий учрашув жойи сифатида кўриб чиқилмаяпти, дейди Reuters манбалари.
Нашрнинг хабар беришича, Саудия Арабистони валиаҳд шаҳзодаси Муҳаммад бин Салмон Трамп лавозимга киришганидан сўнг қўнғироқ қилган биринчи хорижий давлат раҳбари бўлган. Путин эса, 2023 йилда Саудия Арабистони ва БААга ташриф буюриб, АҚШ ва Россия ўртасида маҳбуслар алмашинувини ташкил этишда кўрсатган ёрдами учун Муҳаммад бин Салмонга миннатдорчилик билдирган.
Reuters таъкидлашича, икки давлат раҳбарлари — валиаҳд шаҳзода Муҳаммад бин Салмон ҳам, БАА президенти Муҳаммад бин Зоид Ол Наҳаён ҳам Украинадаги уруш давомида бетарафликни сақлаб, Россияга қарши санкцияларга қўшилмаган. Шунингдек, БАА Россия ва Украина ўртасида асирларни айирбошлашда воситачи сифатида иштирок этган. Икки давлат раҳбарлари Украина президенти Владимир Зеленский билан ҳам мунтазам мулоқот олиб боришган.
Бундан ташқари, икки давлатнинг ҳеч бири Путинга нисбатан қамоқ ордерини чиқарган Халқаро жиноят судига аъзо эмас.
Кремль бу борада изоҳ беришдан бош тортди. Саудия Арабистони ва БАА ҳам ушбу маълумотни шарҳлаш ҳақидаги сўровларга жавоб бермади.
Трампнинг Украинадаги урушни тугатиш бўйича таклифи
Жорий йилнинг январь ойида Трамп Саудия Арабистони ва ОПЕК мамлакатларини нефть нархини пасайтиришга чақирган эди.
Агар нарх пасайса, Россия ва Украина ўртасидаги уруш дарҳол тўхтарди, деб айтган у.
АҚШ етакчиси, шунингдек, яна бир бор “Россия—Украина урушига чек қўйиш учун президент Путин билан тез орада учрашишни хоҳлашини таъкидлаган.
Трамп 3 февраль куни журналистларга маъмурияти Украина, Россия ва турли томонлар билан учрашув ва музокараларни режалаштирганини айтган. У бошқа ҳеч қандай тафсилотларни келтирмаган. АҚШ раҳбари айнан қайси томонлар назарда тутилганига ҳам аниқлик киритмаган.
Аввалроқ Трамп Вашингтон ва Москва ўртасида муҳокамалар аллақачон бошланганини яна бир бор айтиб, уларни “жуда жиддий” деб атаган.
Украина президенти Владимир Зеленский бир оз аввал мамлакат уч йиллик уруш мобайнида ҳеч қачон бугунгидай тинчликка яқин бўлмаганини айтди.
Биз курашмоқдамиз, яшамоқдамиз, тинчликка эришиш учун барча ҳаракатларни амалга оширмоқдамиз. Биз уч йиллик уруш мобайнида ҳеч қачон бугунгидай тинчликка яқин бўлмаган эдик. Биз ўз давлатимизни, мустақиллигимизни, мамлакатимизни, пойтахтимизни, кўплаб шаҳар ва қишлоқларимизни ҳимоя қилдик, деди у.
Зеленский Россия президенти Владимир Путин тинчлик музокараларини истамаслиги ва уларни бузишга ҳаракат қилишини қўшимча қилди.
Изоҳ (0)