АҚШ президенти Дональд Трамп Ғазони назорат қилиш ва минтақани “Яқин Шарқнинг ривераси”га айлантириш режасини илгари суришда давом этмоқда. У фаластинликларни қўшни мамлакатларга кўчиришни, сўнгра Ғазо ҳудудида жаҳон даражасидаги курорт қуришни таклиф қилди.
Бироқ, Трампнинг фикрича, лойиҳани Қўшма Штатлар эмас, балки Форс кўрфазидаги нефтга бой монархиялар молиялаштириши керак.
Middle East Eye маълумотларига кўра, Трамп Саудия Арабистони, Қатар ва БААга фаластинликларни кўчириш ва Ғазони тиклашга маблағ ажратиш учун босим ўтказа бошлаган.
Вашингтондан келган хабар аниқ: энди АҚШдан хоҳлаган нарсангизни шунчаки ололмайсиз, дейди Трамп маъмуриятидаги манба.
АҚШ ва Форс кўрфази мамлакатлари ҳарбий ва иқтисодий манфаатлар билан чамбарчас боғланган. Вашингтоннинг Қатар, Баҳрайн ва Қувайтда ҳарбий базалари бор, Саудия Арабистони ва БАА эса Америка қуролларининг энг йирик харидорлари ҳисобланади. Шу билан бирга, АҚШ араб нефтига қарам, араб давлатлари эса Америка иқтисодиётига сармоя киритмоқда.
Оқ уй бу алоқалардан фойдаланиб, иттифоқчиларни “янги Ғазо сектори”га сармоя киритишга ундамоқчи. Фаластинликларни кўчиришни молиялаштириш эвазига Форс кўрфази давлатларига Ғазо қирғоқларини қуришда фойдали шартномалар таклиф қилиниши мумкин, деб ёзади Билд нашри.
Трамп: “АҚШ Ғазо секторини бошқаради”
АҚШ президенти Ғазо секторини “снос” майдончаси деб атаганди. У анклав аҳолисини турли мамлакатларга, жумладан, Иордания ва Мисрга кўчириб ўтказиш мумкинлигини айтган. У Қўшма Штатлар бу жараённи молиялаштирмаслиги, чунки харажатларни қоплашга Яқин Шарқ давлатларининг қурби етишини таъкидлаганди. Вашингтон эса минтақадаги ишлар учун жавобгар бўлади ва зарурат туғилганда у ерга ўз қўшинларини юбориши мумкинлигини айтган.
Саудия Арабистони ҳукумати ўз баёнотида фаластинликларни ўз ерларидан сиқиб чиқаришга қаратилган ҳар қандай уринишларни қабул қилмаслигини таъкидлаб, Фаластин давлати тузилмагунича Исроил билан муносабат ўрнатмаслигини эълон қилди.
ҲАМАС Трампнинг Ғазодаги фаластинликларни чиқариб юборишга чақирган даъватларини қоралаб, уларни “ўз еридан қувиш” деб атади.
Австралиянинг маҳаллий аҳолиси вакили бўлган сиёсатчи Лидия Торп Трампнинг Ғазони “эгаллаш” ҳақидаги фикрларини “этник тозалаш ва мустамлакачиликнинг очиқ чақириғи” деб баҳолади.
Амнестй International инсон ҳуқуқлари ташкилоти ўтган йилнинг ноябрь ойида Халқаро жиноий суд (ХЖС) Нетаньяхуни қамоққа олиш учун ордер берган бўлса-да, уни қамоққа олмасдан, АҚШ “халқаро одил судловга нисбатан нафратини намойиш этаётганини” билдирди.
АҚШда бир қатор демократлар Трампнинг режасини танқид қилди, демократ сенатор Крис Мерфи эса АҚШнинг Ғазога бостириб кириши минглаб америкалик аскарларнинг ҳалок бўлишига ва Яқин Шарқда ўн йиллаб давом этадиган урушга олиб келишини таъкидлади.
Изоҳ (0)