АҚШ президенти Дональд Трамп мамлакат Ғазо секторини ўз назоратига олишини айтди. У бу ҳақда 4 февраль куни Оқ уйда Исроил бош вазири Биньямин Нетаньяху билан учрашувда маълум қилди.
Трамп Ғазо сектори ҳақида: “Биз унга эгалик қиламиз”
“АҚШ Ғазо секторини назоратга олади, биз у билан ишлаймиз, унга эгалик қиламиз ва у ердаги портламаган барча хавфли бомбалар ва бошқа қуролларни жойида демонтаж қилиш учун жавобгар бўламиз. Агар зарур бўлса, буни амалга оширамиз, бу ҳудудни назоратга оламиз, уни ривожлантирамиз, минглаб иш ўринлари яратамиз. Бу бутун Яқин Шарқ фахрланадиган нарсага айланади”, деди Трамп.
У ерда кимлар яшаши ҳақидаги саволга АҚШ президенти Ғазо сектори “дунё аҳолиси” ва “Яқин Шарқ дарёси”га айланиши мумкинлигини айтди.
“Мен ҳақиқатан ҳам узоқ муддатли бошқарувни кўряпман ва бу Яқин Шарқнинг ушбу қисмига катта барқарорлик олиб келишини тасаввур қиляпман. Мен буни ойлар давомида жуда синчковлик билан ўрганиб чиқдим”, деб давом этди Трамп.
Бу АҚШ қўшинларини Ғазо секторига юборишни англатадими, деган саволга “Биз зарур бўлган ишни бажарамиз”, дея жавоб берди у.
“Мен Исроилни яхши кўраман. Мен у ерга бораман, Ғазони зиёрат қиламан, Саудия Арабистони ва Яқин Шарқнинг бошқа жойларига ташриф буюраман”, деб ваъда берди Оқ уй раҳбари.
Нетаньяху бу сўзларни ижобий қабул қилди. Исроил бош вазирига кўра, Трамп “ғайриодатий, янги ғоялар билан фикрлайди” ва “анъанавий тафаккурни бузишга тайёрлигини намойиш этади”.
Араб мамлакатлари Трамп режасига қарши
Январь ойи охирида Трамп араб давлатларини Ғазо секторидан кўпроқ қочқинларни қабул қилишга чақириб, фаластинлик араблар учун сектор ташқарисида, “улар тинч яшаши мумкин бўлган жойда” уй-жой қуришлари кераклигини айтганди.
1 февраль куни Қоҳирада бўлиб ўтган учрашувда Миср, Иордания, БАА, Саудия Арабистони ва Қатар ташқи ишлар вазирлари Трампнинг Ғазо сектори аҳолисини бошқа араб давлатларига олиб чиқиш ҳақидаги таклифини рад этди. ТИВ раҳбарлари қўшма баёнотида “фаластинликларни кўчириш, кўчиришни рағбатлантириш ёки ўз ерларидан чиқариб юборишга” қарши чиққан.
Изоҳ (0)