Ўзбекистон фуқаролари қонуний тарзда Нидерландияга ишга юборилиши мумкин. Бу ҳақда “Дунё” ахборот агентлиги хабар берди.
Маълум қилинишича, Ўзбекистон элчиси Ғайрат Фозилов Нидерландиянинг EuroTalents рекрутинг агентлиги директори ва агентлик ҳаммуассиси билан учрашди. Музокаралар чоғида Ўзбекистондан Нидерландияга ишчи кучини жалб қилиш, шунингдек, Миграция агентлиги ва EuroTalents рекрутинг агентлиги ўртасида ҳамкорлик алоқаларини ўрнатиш масалалари муҳокама қилинди.
Нидерландия вакилларига Ўзбекистонда миграцияни тартибга солишга оид мамлакат раҳбарияти томонидан қабул қилинган қарорлар тўғрисида маълумотлар берилди. Президентнинг 2024 йил 17 октябрдаги “Хорижда меҳнат фаолиятини амалга ошириш жараёнларини тартибга солиш бўйича қўшимча чора-тадбирлар тўғрисида”ги қарорининг мазмун-моҳиятига эътибор қаратилди.
Бундан ташқари, меҳнат миграцияси соҳаси Европа давлатлари ва Ўзбекистон ўртасидаги ҳамкорликнинг ўзаро манфаатли йўналиши экани қайд этилди. Ўзбекистон бу борада Германия, Буюк Британия, Япония, Корея Республикаси, Исроил, Канада, Польша, Туркия, Саудия Арабистони, Хитой каби хорижий шериклар билан самарали ҳамкорликни йўлга қўйгани таъкидланди.
Нидерландияликлар Ўзбекистон билан логистика ва транспорт, қурилиш ва инфратузилмани ривожлантириш, технология, меҳмонхона бизнеси ва тиббиёт каби соҳаларда меҳнат ресурсларини жалб қилиш соҳасида ҳамкорликни йўлга қўйишдан манфаатдор эканини билдирди.
EuroTalents рекрутинг агентлиги раҳбарияти Бенилюкс мамлакатларидаги компаниялар хорижий ишчи кучини фақат қонуний асосда ёллашини қайд этди. Таъкидланишича, агентлик хорижий фуқароларни ёллаш жараёнининг барча босқичлари, жумладан, шартномалар тузиш, иш ҳақи, уй-жой билан таъминлаш ва қонунчиликка риоя қилиш, кадрларга бўлган эҳтиёжни ҳал этишга яқиндан кўмаклашади.
Учрашув якунида ҳамкорликнинг барча тафсилотларини муҳокама қилиш мақсадида Миграция агентлиги ва EuroTalents рекрутинг агентлиги раҳбарияти ўртасида онлайн музокаралар ўтказиш бўйича келишувга эришилди.
Бундан аввал Литва корхоналари билан 200 нафар Ўзбекистон фуқаросини ишга жойлаштириш тўғрисида келишувга эришилганди. Шунингдек, ўзбекистонликлар Японияга логистика, аэропорт хизмати ва юк ташиш йўналишларида ишга юборилилиши айтилганди.
Ўзбекистонда 2018—2023 йилларда аҳоли даромадининг 16 фоизи мигрантлар улушига тўғри келган. Чет элларда ишлаётган юртдошлар ҳар йили Ўзбекистонга ўн икки-ўн беш миллиард доллар жўнатади.
Изоҳ (0)