Украина Япония билан учувчисиз технологиялар, шу жумладан дронларни биргаликда ишлаб чиқариш соҳасида ҳамкорлик қилишга тайёрлигини билдирди. Бу ҳақда Украина ташқи ишлар вазири Андрей Сибига Kyodo News агентлигига берган интервьюсида маълум қилган.
Сибиганинг таъкидлашича, ҳозирда Украина Россия билан урушда орттирган тажрибага эга ва шу сабабли Киев ва Токио ўртасидаги ҳамкорлик икки томон учун ҳам фойдали бўлиши мумкин.
“Ҳозирги кунда биз дронлар ишлаб чиқариш бўйича жаҳон етакчисимиз... Биз Япония билан тажрибамизни ўртоқлашишга ва ҳамкорлик қилишга, хусусан, дронлар ишлаб чиқаришда ҳамкорлик ўрнатишга тайёрмиз”, дейди вазир.
Сибига Япония конституциясида белгиланган қурол-яроғларни узатиш бўйича қатъий чекловларга ишора қилиб, дронлар соҳасидаги ҳамкорлик қишлоқ хўжалигидан тортиб разведка технологияларигача бўлган кенг қамровни ўз ичига олиши мумкинлигини таъкидлаган.
Агентликнинг эслатишича, Япониядан қурол-яроғ экспорти қаттиқ назорат остида қолмоқда, буни ўз вақтида мудофаа вазири Минору Кихара ҳам таъкидлаган. Бироқ ўтган йили ҳукумат қурол экспорти қоидаларини юмшатган. Энди Токио бошқа давлатларга қирувчи самолётларни сотиши мумкин, аммо жанговар ҳаракатлар олиб борилаётган мамлакатларга самолётлар берилишига йўл қўйилмайди.
Изоҳ (0)