Тошкент шаҳри ва вилоятида нефть маҳсулотларидан ноқонуний фойдаланиш ҳолатлари аниқланди, деб хабар бермоқда Энергетика вазирлиги матбуот хизмати.
Қайд этилишича, Ўзнефтгазинспекция», ҳуқуқни муҳофаза қилувчи органлар ва ишчи гуруҳ аъзолари билан 16 декабрь куни ўтказилган назорат тадбирларида Тошкент вилоятининг Тошкент туманидаги автотураргоҳда нефть маҳсулотлари фуқаролар ҳаётини хавфга қўйган ҳолда сақланаётгани аниқланган.
«Қоплонбек» чегара пости яқинида жойлашган ушбу автотураргоҳда бўлган 86 дона 10 литрлик ностандарт елим идишларда жами 860 литр нефть маҳсулотлари ёнғин ва техника хавфсизлиги қоидаларига зид равишда, фуқароларнинг ҳаётини хавфга қўйган ҳолда сақлаб келинган.
Тошкент шаҳрининг Бектемир тумани, Чирчиқ бўйи кўчасида жойлашган Ҳетинг оил МЧЖга қарашли ҳудудда эса ностандарт металл сиғимлар ва елим идишлар ҳамда синтетик қопларда сақланаётган жами 27 980 литр нефть маҳсулотлари шундай ҳолатда сақланаётгани маълум бўлган.
Ҳозирда ушбу ҳолат бўйича ҳуқуқни муҳофаза қилувчи органлар томонидан терговга қадар текширув ҳаракатлари ўтказилмоқда.
Энергетика вазирлиги тадбиркор ва фуқароларни нефть маҳсулотларини ноқонуний сақлаш, ташиш ва сотишдан огоҳлантирди.
«Бу каби ноқонуний ҳолатлар аниқланганда, биринчидан, аниқланган нефть маҳсулотлари мусодара бўлади. Шунингдек, фуқароларга базавий ҳисоблаш миқдорининг икки бараваридан беш бараваригача, мансабдор шахсларга эса — беш бараваридан ўн бараваригача миқдорда жарима солишга сабаб бўлади. Қолаверса, юқоридаги каби қоидабузарликларга йўл қўйган шахслар ҳуқуқни муҳофаза қилувчи органлар томонидан маъмурий ёки жиноий жавобгарликка тортилишини эслатиб ўтамиз», — дейилади вазирлик хабарида.
Мавзуга доир: Тошкентда автобензин ва дизель ёқилғисини ноқонуний равишда сотиб келган фуқаролар қўлга тушди
Изоҳ (0)