Қозоғистоннинг Туркистон вилоятидаги “Қазиғурт” божхона постида 24 минг литр Аи-92 бензинининг ноқонуний олиб чиқиб кетилишининг олди олинди. Бу ҳақда Давлат даромадлари қўмитасига таяниб, “Kazinform” хабар берди.
Қайд этилишича, “Қазиғурт” божхона пункти ходимлари 15 июнь куни Ўзбекистонга йўл олган DAF русумли автомашинани тўхтатган. Ўзбекистон фуқароси назоратида бўлган автомашинада божхона декларациясига мувофиқ юкланган “Оксигенат” русумли товарнинг ҳиди шубҳа уйғотиб, кўрикдан ўтказилган.
Божхона кўригидан ўтказилганда, жами 24 дона пластик идишга (ҳар бири 1 000 литрдан) бензинга ўхшаш суюқлик солингани аниқланган. Намуналар олиниб, божхона илмий-тадқиқот марказига юборилган ва натижада маҳсулот Аи-92 бензини экани тасдиқланган.
Суд қарорига кўра, қоидабузар маъмурий жавобгарликка тортилиб, 103,5 минг тенге (2,6 миллион сўм) миқдорида жарима солинган ва олиб қўйилган товарлар давлат фойдасига мусодара қилинган. Қозоғистонда ҳозирда автотранспорт воситаларида бензин, дизел ёқилғиси ва айрим нефть маҳсулотларини республика ташқарисига олиб чиқиш тақиқланган.
2022 йилнинг август ойида Қозоғистондан Ўзбекистонга ноқонуний олиб ўтилаётган 2 миллиард сўмлик бензин тўхтатиб қолинганди. Шунингдек, Қозоғистоннинг Павлодар вилоятидан Тожикистон ва Ўзбекистонга ноқонуний йўллар билан вагонларда бензин олиб ўтилаётгани аниқланган эди. 2023 йилнинг май ойида эса Андижонда тадбиркорнинг 19,3 минг литр дизел ва бензини талон-торож қилингани тўғрисида хабар берилганди.
Изоҳ (0)