Мексиканинг Гуанахуато штатидаги ташландиқ уйда 32 кишининг жасади топилди. Бу ҳақда Le Figaro штат прокуратураси матбуот хизматига таяниб хабар бермоқда.
Қўрқинчли топилмани бедарак йўқолганларни қидириш билан шуғулланаётган кўнгиллилар топишган.
Расмий маълумотларга кўра, ҳозирча фақат 15 нафар қурбоннинг шахси аниқланган. Прокуратуранинг таъкидлашича, пластик пакетларда бўлган қолдиқларнинг ҳолати таниб олиш жараёнини мураккаблаштиради. Улар “майдаланган ва мураккаб” деб таърифланган.
“Hasta encontrarte” гуруҳидан йўқолганларнинг қариндошлари ўз яқинлари ҳақида маълумот олиш умидида жасадлар топилган жойга ташриф буюришган.
“Кўп йиллар ўтди, аммо биз ҳали ҳам ҳеч нарсани билмаймиз”, дейди исмини ошкор этмасликни сўраган аёллардан бири.
Гуанахуато наркокартеллар ўртасидаги доимий тўқнашувлар туфайли Мексиканинг энг хавфли штати ҳисобланади. Статистик маълумотларга кўра, жиноий гуруҳларнинг таъсир ўтказиш учун кураши билан боғлиқ мамлакатдаги энг кўп қотиллик айнан шу ерда қайд этилган.
Бу орада Мексиканинг криминал хроникаси янги фожиали эпизод билан тўлдирилди. Гуанахуато штатининг Ирапуаато шаҳрида католик байрами нишонланаётган вақтда отишма содир бўлди. Расмий маълумотларга кўра, ҳодиса оқибатида 11 киши ҳалок бўлган.
Изоҳ (0)