Тошкентнинг икки туманида автобензин ва дизель ёқилғисини ноқонуний равишда сотиб келган фуқаролар ушланди. Бу ҳақда Энергетика вазирлиги матбуот хизмати хабар берди.
Қайд этилишича, декабрь ойининг ўтган даврида истеъмолчиларнинг нефть маҳсулотлари ва сиқилган газга бўлган эҳтиёжларини қондириш бўйича жойларда «Ўзнефтгазинспекция», ҳуқуқни муҳофаза қилувчи органлар ва ишчи гуруҳ аҳзолари томонидан назорат тадбирлари олиб борилмоқда.
Тадбирлар давомида айрим фуқаролар томонидан ноқонуний хатти-ҳаракатлар аниқланмоқда.
Жумладан, Мирзо Улуғбек тумани, Ойдин кўчасидаги уйда яшовчи фуқаро А.С. 300 дона 10 литр ҳажмдаги пластик идишларда 2 995 литр дизель ёнилғиси ҳамда шу кўчадаги бошқа уйда яшовчи фуқаро У.Р. 101 дона 10 литр ҳажмдаги пластик идишларда (80 донаси солярка, 21 донаси автобензин) 800 литр дизель ёнилғиси ва 200 литр автобензин сақлагани ва уларни ноқонуний равишда сотиб келгани аниқланган.
Миробод тумани, Амир Темур кўчасида фуқаролар Ш.И ва М.Р. кичик юк автомашинасида 1 000 литр дизель ёқилғисини қонунга ҳилоф равишда сотаётган вақтида ушланган.
Ҳозирда ушбу ҳолат бўйича ҳуқуқни муҳофаза қилувчи органлар томонидан терговга қадар текширув ҳаракатлари ўтказмоқда.
Мавзуга доир: Ўзбекистонда АИ-80 бензини ишлаб чиқариш ҳажми 50 фоиздан кўпроққа оширилди
Изоҳ (0)