Келаси йилдан мамлакатда айрим солиқ ставкалари ўзгаришсиз қолиши, баъзилари пасайтирилиши ва оширилиши хабар қилинди.
Иқтисодиёт ва молия вазирлиги 2025 йил учун солиқ сиёсатининг асосий йўналишларини маълум қилди. Унга кўра, келаси йилда Ўзбекистонда қуйидаги асосий солиқ ставкалари ўзгаришсиз қолдирилади:
- фойда солиғи (15 фоиз);
- қўшилган қиймат солиғи (12 фоиз);
- жисмоний шахслардан олинадиган даромад солиғи (12 фоиз);
- юридик шахслар мол-мулк солиғи (1,5 фоиз);
- айланмадан олинадиган солиқ (4 фоиз).
Шу билан бирга, айрим турдаги солиқ ставкалари ўзгаради. Хусусан, якка тартибдаги тадбиркорларнинг ёлланма ходимлари учун ижтимоий солиқ 1 йилга БҲМнинг 6 бараваридан 1 бараварига пасайтирилади. Мобил алоқа хизматлари учун акциз солиғи бекор қилинади.
Электрон тижорат иштирокчилари учун фойда солиғи ставкалари эса 7,5 фоиздан 10 фоизга, айланмадан олинадиган солиқ ставкаси 2 фоиздан 3 фоизга оширилмоқда.
Вазирлик ахборотига кўра, иқтисодиётнинг барча тармоқлари, жумладан саноат, хизматлар ва қурилиш соҳалари учун сув солиғи ставкаси тенглаштирилмоқда. Бунда, қишлоқ хўжалиги ерларини суғориш ва балиқларни етиштириш (ўстириш) учун сув ресурсларидан фойдаланганлик учун солиқ (100 сўм) ўзгаришсиз қолмоқда.
Импорт қилинган табиий газни истеъмолчиларга реализация қилишда акциз солиғи солинмаслиги бўйича тартибни бекор қилган ҳолда, акциз солиғи ставкасини 20 фоиздан 12 фоизгача пасайтириш режалаштирилмоқда.
Яна қайси солиқлар оширилади?
Аввалроқ Иқтисодиёт ва молия вазирлиги 2025 йил 1 апрелдан нефть маҳсулотлари учун тўланадиган акциз солиқ ставкаларини 10 фоизга оширишни режалаштираётгани хабар қилинган. Мазкур таркибга бензин, авиакеросин, дизель ва ЭКО дизель ёнилғиси, дизель ёки карбюратор (инжектор) двигателлари учун мотор мойи ҳамда якуний истеъмолчига реализация қилинадиган бензин, дизель ёнилғиси, суюлтирилган ва сиқилган газ киради.
2025 йил 1 январдан сув ресурсларидан фойдаланганлик учун солиқ ставкаларида қуйидагилар таклиф этилмоқда:
- электр станциялари, коммунал хизмат кўрсатиш корхоналари, алкоголсиз ичимликлар ҳамда алкоголь маҳсулотлари (пиво ва винодан ташқари) ишлаб чиқарувчилар ҳамда саноат корхоналари учун фойдаланиладиган сув ҳажмига қўлланадиган солиқ ставкаларини ўртача 10 фоизга индексация қилиш;
- кон-кимё хом ашёси ҳамда бошқа норуда қурилиш материаллари учун қазиб олинган ҳажмга белгиланган қатъий миқдорларни 10 фоизга индексация қилиш.
Келаси йил 1 январдан юридик ва жисмоний шахсларнинг турар ҳамда нотурар кўчмас мулк объектларига солинадиган мол-мулк солиғи ставкаларини 10 фоизга ошириш режалаштирилмоқда. Шу билан бирга, юридик ва жисмоний шахслардан олинадиган ер солиғининг базавий ставкалари ўртача 10 фоизга индексация қилинади.
2025 йил 1 январдан якка тартибдаги тадбиркорларнинг қатъий белгиланган миқдорлардаги солиқ ставкаларини инфляция даражасидан келиб чиқиб 10 фоизга оширилади. Шу санадан бошлаб мол-мулкни ижарага берувчи жисмоний ва юридик шахслар учун солиқ солиш мақсадида қўлланадиган ижара тўловининг энг кам ставкалари 10-12 фоизга индексация қилиш белгиланмоқда.
Изоҳ (0)