Қонунчилик палатасининг сайловдан кейинги биринчи мажлиси, кучга кирган янги қонунлар, Андижон вилояти бўйича йиғилиш: 18 ноябрнинг энг муҳим хабарлари

Қонунчилик палатасининг биринчи ташкилий мажлиси, палатада тузилган 10 та қўмита, тақдирланган артистлар, кучга кирган янги қонунлар — “Дарё” нашри бугун, 18 ноябрда эълон қилинган Ўзбекистоннинг ижтимоий-сиёсий ҳаётига оид эътиборга молик хабарларни бир жойга тўплади.

Ўзбекистонда янги дизель поезди синовдан ўтказилади

Поезд ҳаракат вақти 6 соатдан иборат бўлиб, 592 километр масофани босиб ўтади. Поезд Тошкент—Бухоро—Тошкент йўналишида синовдан ўтгач, яқин кунларда йўловчиларга фойдаланиш учун топширилади.

Қашқадарёда Isuzu қўйлар подасини уриб юборди

17 ноябрь куни соат 05:00 ларда фуқаро А.С. бошқарувида бўлган Isuzu русумли транспорт воситаси икки шахсга тегишли 95 бош майда шохли молларини уриб юборган.

Олий Мажлис Қонунчилик палатасининг биринчи ташкилий мажлиси бўлиб ўтди

Унда Нуриддин Исмоилов Қонунчилик палатаси спикери этиб сайланди. Депутат Мавлуда Хўжаева спикер биринчи ўринбосари, депутат Раҳимжон Ҳакимов спикер ўринбосари бўлди. Шавкат Мирзиёев мажлисда нутқ сўзлаб, Қонунчилик палатасига депутат этиб сайланганларни табриклади ва бу йилги парламент сайловларининг энг муҳим жиҳатлари ҳақида тўхталиб ўтди.

Президент партиялар сайлов кампанияси давомида илгари сурган ва халқ қўллаб-қувватлаган ҳар бир таклиф албатта кўриб чиқилиши ва амалга оширилишини таъкидлади. Давлат раҳбари Парламент фаолиятида ютуқлар билан бирга эътибордан четда қолган масалалар ҳам бўлганини қайд этиб, уларнинг айримларига тўхталиб ўтди.

Қуйи палатадаги 12 та қўмита ўрнида 10 та янгиланган қўмита ташкил қилинди. Уларнинг 9 тасига раислар сайланди.

Президент парламентда мухолифатни жонлантириш зарурлигини айтди. Қонунчилик палатаси ҳузурида Жамоавий ташаббуслар бўйича парламент комиссиясини ташкил этишни таклиф қилди.

Ўзбекистон ва Россиянинг икки нафар артисти “Дўстлик” ордени билан мукофотланди

Россия президенти Владимир Путин фармони билан Фаррух Зокиров ва Севара Назархон “Дўстлик” ордени билан тақдирланди. Ўзбекистон президенти фармони билан Россия халқ артисти, Москва драма театри бадиий раҳбари, театр ва кино актёри Сергей Безруков ва Россия халқ артисти, балет артисти, режиссёр Андрис Лиепа “Дўстлик” ордени билан мукофотланди.

Апелляция инстанцияси Ботир Қодировни Шерали Жўраевнинг ўғли деб топди

Биринчи инстанциянинг қарори тўлиқ ўз кучида қолди.

Ўзбекистонда бўлиши номақбул деб топилган чет элликларга оид қонун кучга кирди

Бундай шахслар рўйхатига Ўзбекистон халқи шаъни, қадр-қимматини, тарихини таҳқирловчи оммавий чиқишлар қилганлар ҳам киритилади.

“Ўзбекистон Республикаси Олий Мажлисининг Инсон ҳуқуқлари бўйича вакили (омбудсман) тўғрисида”ги қонун ҳам кучга кирди

Унга кўра, омбудсманга фуқаролар шикояти асосида текширув ўтказиш ҳуқуқи берилди. Айни бир шахс омбудсман лавозимига сурункасига икки муддатдан ортиқ сайланиши мумкин эмаслиги белгиланди.

Қариндошлари билан бирга ишлаши мумкин бўлган давлат ташкилотлари ходимлари рўйхати тасдиқланди

Вазирлар Маҳкамаси билан тасдиқланган қарорда рўйхатдан 17 та давлат ташкилоти ходимлари ўрин олди.

Президент Андижондаги қўшимча имкониятларни ишга солиш бўйича таклифларни кўриб чиқди

Давлат раҳбари вилоят ҳокими таклифларини маъқуллаб, янги имкониятлардан самарали фойдаланиш, лойиҳаларни замонавий инфратузилма билан таъминлаш, аҳолининг бандлигини ва даромадларини ошириш бўйича қўшимча кўрсатмалар берди.