Қонунчилик палатаси ялпи мажлисида доимий равишда қоидабузарликлар содир этганлик учун жарима баллари ҳисоблаш тизими жорий этилишини назарда тутувчи қонун лойиҳаси биринчи ўқишда кўриб чиқилди.
Қонун лойиҳаси билан таклиф этилаётган ўзгартиришларга кўра, Маъмурий жавобгарлик тўғрисидаги кодексга йўл ҳаракати қоидабузарликлари бўйича ҳисобланган жарима баллари белгиланган миқдордан ошганлик учун маъмурий жазо қўлланишига оид модда киритилмоқда.
Жарима баллари ҳуқуқбузарлик биринчи марта содир этилган кундан бошлаб бир йил давомида ҳисоблаб борилади.
Ҳисобланган жарима баллари бир йил давомида ўн икки баллдан ошган ҳолларда охирги содир этилган ҳуқуқбузарликка қўшимча жазо тариқасида ҳайдовчининг транспорт воситасини бошқариш ҳуқуқидан маҳрум қилинишига сабаб бўлади.
Жарима баллари белгиланган миқдордан ошганлик учун маъмурий жазо Жиноят ишлари бўйича туман (шаҳар) суди томонидан қўлланади. Балларни ҳисоблаш тартиби ҳукумат томонидан белгиланади.
Қонунчиликка “йўл безорилиги” тушунчаси киритиляпти.
Маълумот учун: Ноқонуний “автопойга”ларда қатнашадиган, “дрифт”, “шахмат” шаклида бошқарадиган ҳайдовчилар жавобгарликка тортилади. Автотранспорт воситаларининг давлат рақамларини қалбакилаштирганлик ҳамда ҳайдовчиларни тайёрлаш ва қайта тайёрлаш тартибини бузганлик учун жиноий жазо чоралари қўлланади.
Транспорт воситаларини маст ҳолатда бошқарганлиги бўйича текширувдан ўтишдан бўйин товлаш, автомобилни бошқаришни маст шахсга топшириш ҳамда транспорт воситасини бошқариш ҳуқуқидан маҳрум этилган шахснинг транспорт воситасини бошқарганлик учун жиноий жазони белгилаш назарда тутилмоқда. Шунингдек:
- Сиқилган табиий газда, суюлтирилган нефть газда ёки дизель ва газсимон ёқилғи аралашмасида ишлайдиган транспорт воситаларидан фойдаланишда хавфсизлик қоидаларини бузиш жиноий жазо белгиланишига сабаб бўлади.
- Мастлик ҳолатида ёки гиёҳвандлик воситалари, уларнинг аналоглари, психотроп ёки шахснинг ақл-идрокига таъсир кўрсатувчи бошқа моддалар таъсири остида ҳуқуқбузарлик содир этилиши маъмурий жавобгарликни оғирлаштирувчи ҳолат сифатида баҳоланиши белгиланмоқда.
- Автомобиль йўллари ва кўчалардан фойдаланиш, уларни таъмирлаш ишларини ташкил этиш ва сақлаш қоидаларини бузиш учун жазо чоралари белгиланмоқда.
- Фоторадар ва видеокамера орқали аниқланган ҳуқуқбузарлик учун юридик шахснинг транспорт воситасини ижара шартномаси асосида олган шахсга нисбатан маъмурий жазо қўлланилиши белгиланмоқда.
- Юк ташиш қоидаларини, шатакка олиш қоидаларини бузиш бўйича белгиланган жазо чоралари табақалаштирилган ҳолда белгиланади.
- Транспорт воситалари ҳайдовчиларининг белгиланган ҳаракат тезлигини соатига 60 километрдан ортиқ катталикда ошириб юбориш учун жазо чоралари белгиланмоқда.
- Транспорт воситасида одам ташиш ҳамда транспорт воситасида қувиб ўтиш қоидасини бузганлик учун маъмурий жавобгарликка тортилади.
- Ҳуқуқни муҳофаза қилувчи органлар ходимларининг ўз хизмат вазифаларини бажаришлари билан боғлиқ маълумотларни уларни обрўсизлантириш ёки ҳақорат қилиш мақсадида Интернет ахборот тармоғида жойлаштириш таъқиқланмоқда.
- Олий Мажлис Қонунчилик палатаси Спикери ўринбосари Одилжон Тожиев “Ўйлайманки, ушбу қонун лойиҳаси йўл ҳаракати иштирокчиларининг қоидаларга қатъий амал қилишини таъминлашга, йўл-транспорт ҳодисаларининг олдини олишга хизмат қилади”, — дея изоҳ қолдирган.
Изоҳ (0)