Афғонистонда кузатувлар бошланганидан буён болалар тўйиб овқатланмаслигининг энг кескин ўсиши қайд этилди. Бу ҳақда БМТнинг Жаҳон озиқ-овқат дастури баёнотига асосланиб CNN телеканали хабар бермоқда.
Ташкилот ҳисоб-китобларига кўра, мамлакат аҳолисининг тўртдан бир қисми - қарийб 10 миллион киши — ўткир озиқ-овқат танқислигидан азият чекмоқда. Афғонистондаги ҳар учинчи бола сурункали тўйиб овқатланмаслик туфайли ўсишдан орқада қолмоқда.
Таъкидланишича, вазиятнинг кескинлашуви сўнгги икки йил ичида гуманитар озиқ-овқат ёрдами ҳажмининг қисқариши билан боғлиқ. Бунга молиявий қўллаб-қувватлашнинг сезиларли даражада камайиши сабаб бўлган. Хусусан, жорий йилнинг апрель ойида АҚШ президенти Дональд Трамп маъмурияти дунёнинг энг камбағал мамлакатларидан бири бўлган Афғонистонга озиқ-овқат етказиб беришни бутунлай тўхтатди.
“Озиқ-овқат хавфсизлигининг ёмонлашувига қўшимча омил сифатида қўшни мамлакатлардан афғонларнинг оммавий равишда қайтиши бўлди. Бу мамлакатларда ноқонуний муҳожирлар деб тан олинган чет элликларнинг депортацияси кучайган эди. Сўнгги икки ой ичида Жаҳон озиқ-овқат дастури Эрондан қайтган 60 минг кишини қўллаб-қувватлади”, дейилади ҳисоботда.
Жаҳон озиқ-овқат дастури вакили Зиёуддин Сафийнинг айтишича, Эрондан қайтаётган барча муҳтож афғонларга ёрдам бериш учун 15 миллион доллар зарур. Умуман олганда, 2026 йил январигача бутун мамлакат бўйлаб энг заиф оилаларни қўллаб-қувватлаш учун дастур 539 миллион долларга муҳтож.
Бундан ташқари, Афғонистондаги озиқ-овқат билан боғлиқ вазиятни иқлим инқирози янада оғирлаштирмоқда. Атроф-муҳитни муҳофаза қилиш миллий агентлиги раҳбари Матиулла Халиснинг сўзларига кўра, қурғоқчилик, сув танқислиги, унумдор ерларнинг қисқариши ва тўсатдан юз берадиган сув тошқинлари аҳоли ҳаётига ҳам, мамлакат иқтисодиётига ҳам жиддий таъсир кўрсатмоқда.
Бундан аввал БМТ Болалар жамғармаси (UNICEF) Ғазода очарчилик хавфи кескин ортиб бораётганини ва ҳар учинчи инсон бир неча кунлаб овқатсиз қолаётганини маълум қилганди. Ташкилотнинг таъкидлашича, очарчилик сабаб ҳалок бўлганлар сони 162 нафарга етган, шундан 92 нафари болалардир.
Апрель ойида Бирлашган Миллатлар Ташкилоти Ғарбий ва Марказий Африкада нархларнинг ошиши сабабли, яқин ойларда 55 миллионга яқин одам очарчилик билан курашишга тўғри келиши ҳақида огоҳлантирганди.
Изоҳ (0)