Бундесвер Германия ҳукуматининг махфий режасига асосланиб, Россия билан уруш бошланган тақдирда мамлакатнинг йирик компаниялари ўртасида тушунтириш ишларини олиб боришга киришди. Бу ҳақда Frankfurter Allgemeine Zeitung (FAZ) нашри манбаларга таяниб хабар берди.
Қайд этилишича, ҳужжатнинг “Германия оператив режаси” деб номланган асл нусхаси мингга яқин саҳифани ўз ичига олади. Унда уруш пайтида ҳимояга муҳтож бўлган тузилмалар ва инфратузилма объектлари санаб ўтилган. Шунингдек, Россиянинг НАТО шарқий қанотидаги манёврлари оқибатида мудофаа ёки кескинлик юзага келганда, Германия юз минглаб қўшинлар учун логистика марказига айланиши, асбоб-ускуналар ва дори-дармонларни етказиб бериш учун нима қилиш кераклиги ҳақида кўрсатмалар мавжуд.
FAZ’га кўра, яқинда Гамбург Савдо палатасида бўлиб ўтган йиғилишда ҳарбийлар бизнес вакиллари билан бевосита суҳбатлашган ва ҳар 100 нафар ходимга камида бешта қўшимча юк машинаси ҳайдовчисини тайёрлашни тавсия қилган. Гамбург штати қўмондони, подполковник Йорн Плишке ҳам компанияларга автономияга интилишни, хусусан, дизель генераторлари ёки ўзларининг шамол турбиналаридан фойдаланиш, фавқулодда вазиятнинг батафсил режасини тузишни маслаҳат берган.
Бизнес вакиллари билан учрашувлар
Гамбургда Бундесвер вакили билан яна бир учрашув бўлиб ўтди, унда “мутлақо аниқ саволлар”, хусусан, “иттифоқчи қўшинлар шаҳар орқали кирса, Эльба дарёси тўсиб қўйилган бўлса, темир йўл тармоғига ҳужум қилиниб, электр энергияси йўқлиги сабабли дўконлар фаолиятини тўхтаца нима қилиш керак” кабилар муҳокама қилинган.
Плишкенинг сўзларига кўра, бизнес вакиллари билан бундай учрашувлар бутун Германия бўйлаб ўтказилади. Бундесвер барча минтақавий қўмондонликларга ушбу вазифаларни бажариш юклатилганини айтган.
“Россия аллақачон урушга тайёргарлик кўришни бошлаган”, дея ишонч билан фикр билдирган Плишке.
У разведка маълумотларига асосланиб, тўрт-беш йилдан кейин Россия Ғарбда навбатдаги ҳужумга тайёр бўлишини тахмин қилмоқда.
Немис нашрининг қайд этишича, “Германия оператив режаси” ҳали тугалланмаган, у фуқаролик тузилмалари ҳамда Бундесвер ўртасидаги қўшма машғулотлар натижаларига кўра тўлдирилади. Ушбу машқларнинг биринчи босқичида разведка ва қўпорувчилик ҳаракатларининг олдини олиш учун порт объектларини ҳимоя қилиш амалиёти ўтказилди. Иккинчи босқич, нашр ёзганидек, анча катта бўлиши кутилмоқда.
Изоҳ (0)