Жиззахда 13 сотих, Самарқандда эса 2,4 гектар ерни сотмоқчи бўлган шахслар қўлга олинди. Бу ҳақда Бош прокуратура матбуот хизмати хабар берди.
Маълум қилинишича, Жиззах вилоятида 2024 йили ўтказилган назорат тадбирларда 822 гектар ер майдонлари талон-торож қилингани аниқланиб, 111 та жиноят ишлари қўзғатилган.
Шундан 6 та ҳолатда 55 гектар суғориладиган ерларда фуқаролар ноқонуний уй-жой қургани оқибатида давлатга 13,3 млрд сўм зарар етказган.
Масалан, фуқаро Ж.Х.нинг аризасига асосан ўтказилган тезкор тадбирда Ё.Д. фуқаро Ж.Х.ни алдаб, Зомин туманида ўзбошимчалик билан эгаллаб олинган жами 0,13 гектар ер майдонини 300 млн сўмга сотишга келишиб, 200 млн сўм ҳамда 8 минг доллар олган вақтда ушланган.
Ер сотиш билан боғлиқ 36 та жиноятлар фош этилиб, 362 гектар ернинг ноқонуний муомаласи олди олинган.
Шунингдек, Самарқандда фуқаро Ф.О.нинг мурожаатига асосан тезкор тадбир ўтказилди.
Фуқаро Т.Ш. укаси М.Р. раҳбарлик қилиб келаётган Ургут туманида жойлашган “Р.Б.Н.” фермер хўжалигига қарашли 2,4 гектар суғориладиган ер майдонини 95 минг долларга сотишга келишган. У келгусида мансабдор танишлари орқали ҳужжатларни унинг номига расмийлаштириб беришини ваъда қилиб, олдиндан 10 минг доллар олаётган вақтида ушланган.
Мазкур ҳолат юзасидан Жиноят кодексининг 25,168-моддаси 4-қисми “а” банди (фирибгарлик жуда кўп миқдорда) билан жиноят иши қўзғатилиб, тергов ҳаракатлари олиб боришга киришилган.
Ҳуқуқ-тартибот органлари билан ҳамкорликда ўтказилган тезкор тадбирларда 1 980 гектар ер майдонларини 14,6 млн доллар ва 13,6 млрд сўмга сотиш ҳолатларига чек қўйилиб, 4,3 млн доллар ва 9,4 млрд сўм ашёвий далил сифатида олинган.
Ер сотиш ҳолатлари
Аввалроқ Тошкентда Давлат кадастрлар палатаси туман филиали бошлиғи 25 минг доллар олаётганида ушланганди. Шунингдек, Навоий, Наманган ва Андижон вилоятларида ноқонуний йўллар билан ер майдонлари олиб беришни ваъда қилган шахслар қўлга олинган.
Изоҳ (0)