Эрон аэрокосмик кучлари ҳарбий машғулотларда “Ғазо” номли ўта оғир дронини намойиш қилди. Бу ҳақда Тhе Economic Times хабар берди.
Дроннинг қанотлари кенглиги 22 метр ва учиш оғирлиги 3100 килограммни ташкил этади. Унинг парвоз давомийлиги 35 соат бўлиб, тезлиги соатига 350 километргача етади. Ғазо дронининг юк кўтариш қобилияти камида 500 килограмм, у 12 тагача бомбани таший олади. Учиш масофаси эса минг километр ва операцион радиуси 4000 километрни ташкил қилади.
Ҳарбий машқлар доирасида “Ғазо” дрони саккизта нишонни аниқ ва муваффақиятли йўқ қилишга эришган. Ғазо сектори шарафига номланган дрон чегара операциялари ва миллий хавфсизликни ошириш учун мўлжалланган. Генерал майор Ҳусайн Салами ва Амир Али Ҳожизода 26 январь куни дронни кўздан кечириб, унинг таҳдидларга қарши курашда самарадорлигини таъкидлади.
19 январь куни Эрон ўзининг махфий ерости базасини намойиш қилганди. База Форс кўрфази қирғоғида ер остида жойлашган бўлиб, мураккаб ва узун туннеллар тизимига эга. Унинг чуқурлиги 500 метрга етади. Иншоот “яхши ҳимояланган кемалар учун ерости шаҳри” деб таърифланган. Базанинг Форс кўрфазига бир нечта чиқиш йўллари мавжуд бўлиб, улар кемаларни тезда сувга тушириш имконини беради.
Бу база Эрондаги бир нечта шунга ўхшаш базалардан биридир. У узоқ масофага ракета учиришга ва узоқ масофадан жанговар ҳаракатларни олиб боришга қодир кемалар учун қурилган эди.
Изоҳ (0)