Sirdaryoda besh gektar yer maydonini 40 ming dollarga sotishga uringan opa-uka qo‘lga olindi. Bu haqda “Zamon” informatsion dasturida ma’lum qilindi.
Qayd etilishicha, opa-uka o‘zaro til biriktirib, Sayhunobod tumani hududidagi daryo bo‘yicha tosh-shag‘al qazib olishga mo‘ljallangan besh gektar yerni 40 ming AQSH dollariga sotishga uringan. Aniqlanishicha, ushbu yer maydoni ularga foydalanish uchun ajratilib, keyinchalik viloyati hokimining tegishli qarori bilan bekor qilingan.
Opa-uka yer o‘zlariga tegishli ekanini aytib, kelishilgan puldan 20 ming dollarini olgan vaqtida ashyoviy dalillar bilan ushlangan. Opa karyer hujjatlarini FVV va Ekologiyadagi tanishlari orqali rasmiylashtirib berishni va’da qilgan, biroq sudda bunday tanishlari yo‘qligini bildirgan.
Sudlanuvchilar Jinoyat kodeksining tegishli moddalari bilan aybdor deb topildi — uka 5 yil 6 oy muddatga ozodlikdan mahrum etildi. Opasiga esa 5 yil muddatga ozodlikni cheklash jazosi tayinlandi. Shuningdek, u BHMning 210 barobari miqdorida (63 million so‘m) jarima to‘laydi.
Noqonuniy yer savdolari
Aprel boshlarida Navoiyda 80 gektar yerni 1 milliard so‘mga sotishga uringan shaxslar qo‘lga olingani, Samarqand va Farg‘onada noqonuniy yer sotish holatlariga chek qo‘yilgani to‘g‘risida xabar berilgandi. Shuningdek, Qoraqalpog‘iston Respublikasi va Buxoro viloyatida yer maydonlari savdosi bilan bog‘liq firibgarlik holatlari fosh etilgandi.
Izoh (0)