Иккинчи қавати шишириладиган ҳаво шаридан иборат ихчам уй концепти тақдим этилди (фото)

Ғилдиракли мини-уйлар ва бошқа мобил хонадонларни ишлаб чиқариш билан шуғулланадиган муҳандислар хонадондаги ҳар бир жойни тежаш, уй эгасига кенг имкониятлар бериш ҳамда вақтинчалик фойдаланадиган жойларни кенгайтириш усуллари устида изланишлар олиб боради. Уларнинг натижаси ўлароқ Люксембургда олти кишини ўзида сиғдирадиган ҳаво гумбазли уй ихтиро қилинди.

E22SSPIU! деб номланган лойиҳа Люксембургнинг Эш шаҳрида “2001” компанияси томонидан ишлаб чиқилган. Мазкур лойиҳа уй-жой қурилишидаги янги тадқиқотларнинг бир қисмидир.

Конструкция асоси зангламайдиган пўлатдан ишланган икки ўқли тиркамадан иборат. Орқа томонда жойлашган катта ойнадан ташқари, уйнинг деярли ҳеч қаерида деразалар йўқ. Кириш қисмида кичик металл пандус мавжуд.

Уй транспортировкаси вақтида фақат пастки қаватдан фойдаланиш мумкин. Хонадоннинг биринчи қаватида душ, раковина, ҳожатхона, турли жавонлар, музлатгич ва кичик ошхона ўрин олган.

E22SSPIU! Ҳаракатда бўлмаган вақтда уйнинг иккинчи қаватини кўтариш мумкин. Бунинг учун пневматик таянчлар ёрдамида аввал том кўтарилади ва пол ҳосил қилинади. Сўнг компрессор ёрдамида катта икки қаватли гумбазга ҳаво пуфланади. Хонадоннинг иккинчи қавати тайёр! У ер ётоқхона учун мўлжалланган бўлиб, олти кишини ўзига сиғдиради.

Иккинчи қаватнинг интерерида ҳеч қандай элементлар йўқ, у ер ягона бир кенг хона ва бир нечта матраслардан иборат. Хонадон эгаси иккинчи қаватдан ётоқхона сифатида фойдалана олади. У эрга ошхонадаги зинапоя ёки лифт орқали чиқиш мумкин.

Бундай ечим амалда қулай эмасдир, аммо тез-тез кўчиб юрадиган аҳоли учун кичик жойдан максимал даражада фойдаланиш ғояси фойдали бўлиши мумкин.