Сергели аҳолисига йўл керак. Янгиҳаёт ҳокимлиги улар фойдаланиб турган ягона йўлни ҳам бузиб ташлади (видео)

Тошкент шаҳрининг Сергели туманидаги “Жунариқ” маҳалласида жойлашган кўп қаватли уйларда яшовчи 1500 дан ортиқ хонадон вакилларига ишга бориб-келиш, шунингдек, шаҳар марказига чиқиш учун йўл керак. Бори ҳам Янгиҳаёт ҳокимлиги томонидан ковлаб, бузиб ташланди. Бу ҳақда “Дарё”га мурожаат қилган аҳоли вакиллари гапириб берди.

Мана шу уйларда яшаймиз. Ягона йўлимизни ҳам қазиб ташлашди. Машина билан уйга ўтолмаяпмиз. Ўзи битта шу кўча бор эди. Бу уйларда мингдан ортиқ хонадон бор. Йўлни қазиб қўйишгани учун машинамизни беш юз метр ёки бир километр узоққа ташлаб, ёмғирли кунларда ҳам пиёда уйга киришга мажбурмиз. Метронинг тагида йўл бор, фақат лой, юриб бўлмайди. Асфалт қилиб беришса, кириб-чиқишда муаммо бўлмасди. Бу ерда йўл муаммоси шу уйлар қурилганидан бери бор. Кўп қаватли уйларда яшовчи аҳоли ҳар доим бир томонлама йўлдан, тирбандликда юришга мажбур. Машиналарнинг бу ҳолатда юриши йўл юзида яшовчи одамларга ҳам ноқулайлик туғдирмоқда. Иккинчи йўл ҳам бор, аммо у ерга шлагбаум ўрнатиб ёпиб қўйишган, дейди Ҳасан Хўжаназаров.

Кўп қаватли уйларда яшовчи Сирожиддин Ҳамроевнинг айтишича, йўл муаммосини ҳал қилишини айтган ҳокимлик аҳолига олти ойдан бери ваъда беради. Аммо натижа йўқ.

Шу уйларни қуриб сотган қурилиш ташкилоти БМ Group йўл ҳам қуриб берамиз деганди. Лекин қуриб бермади, уйни қурди ва кетди. Болаларимиз мактаб ёки боғчага лой кечиб боряпти. Йўл йўқлиги, бори ҳам мана шунақа қилиб ёпиб қўйилгани учун уйимизга киролмаймиз. Муаммо юзасидан маҳаллага чиқсак ҳокимиятга борамиз дейди, ҳокимиятга борамиз десак, мана бу томони Сергели бўлса, бу томони Янгиҳаёт. Ўртада йўл йўқ, одамлар сарсон, дейди Сирожиддин Ҳамроев.

Аҳоли вакилларидан яна бири Ҳумоюн Эргашевнинг “Дарё”га билдиришича, 22 январь куни ҳудудга Сергели ҳамда Янгиҳаёт тумани ҳокимлари ва масъуллар келиб, аҳолининг йўл муаммосига ечим излаган.

Шу ердан метронинг иккинчи бекатигача йўл очилиши керак эди. Йўлда авария ҳолатидаги лой кўприк бор. Бизлар депутатимиз билан маҳалла Кенгашларига мурожаат қилгандик. Кеча Сергели ҳамда Янгиҳаёт тумани ҳокимлари келибди. Улар шу ердан йўл очилишига, йўлнинг таъмирланишига рухсат бериб кетишибди, дейди у.

Ҳумоюн Эргашев, шунингдек, кўп қаватли уйларда яшовчи одамларнинг таъкидлашича, хусусий клиника ёнидаги шлагбаум ҳам ёпиб қўйилган бўлиб, кўп қаватли уйларда яшовчи аҳолининг кириб-чиқиши муаммога айланган.

Янгиҳаёт ҳокимлиги масъуллари йўлни кавлаб қўйишганига расмий изоҳ берса керак. Нега ковлашганидан айнан менинг хабарим йўқ. Лекин кавлашибди. Бунинг сабабини ўзлари айтишар. Бу кўчадан чиқиб кетадиган йўлда эса иккита шлагбаум қўйилган. Биринчиси очилган, иккинчиси ёпиқ турибди. Ёпиқ қўйилишининг сабабини мен аниқ билмайман. Айтишларига қараганда у ёқдаги кўприк ҳам автомобиль ўтиб-қайтиши учун носоз ҳолатда экан. Қандайдир техник носозлик сабабли ёпишган экан. Бизлар масъуллардан изоҳ кутяпмиз. Асосий йўлимиз тез кунларда битиб қолса, халқимизга анча яхши бўларди, дейди Ҳумоюн Эргашев.

Яна бир суҳбатдош эса кўп қаватли уйларда яшовчи аҳолининг йўли кавлаб, ёпиб қўйилгани учун одамлар машинада хусусий клиника томондан, шлагбаумдан пул бериб ўтишга мажбур бўлмоқда.

Одамларга зулум бўлмаслиги керак-да. Йўлни ёпишгач, машинамизни уйимиздан узоққа қўйишга мажбур бўляпмиз. Кечаси баллонини ечиб кетишса, кимга зарар, бизга зарар. Ўтган куни танишим хусусий клиника томондаги шлагбаумдан пул бериб ўтибди. Пул берса ўтказиб юборяпти, бўлмаса шлагбаумни ёпиб қўйишган, дейди у.

Мурожаатчиларнинг айтишича, икки ҳокимлик ўртасидаги келишмовчилик аҳолига муаммо туғдирмоқда.

Кеча бу ерга иккита туман — Сергели ва Янгиҳаёт туманлари ҳокимликларидан ходимлар келишди. Улар ўзаро жанжаллашишди. Айтишларича метронинг айнан шу қисми икки туман ҳудудини ажратувчи чегара экан. Пост эмиш. Бу янги уйларда яшовчилар ўзларининг йўлини топиб, юришлари керак экан. Бунақа “ишкал” олдин ҳам бўлган. Олдин бетон тўсиқ қўйишган, кейин уни одамларнинг шикоятидан сўнг, олиб ташлашган. Бу кўп қаватли уйда яшовчилар учун аслида учта йўл бор. Битта йўлимиз мана Янгиҳаёт ҳокимлиги томонидан ёпиб қўйилгани бўлса, яна бири “ШоҳМед” хусусий клиникаси олдидаги йўл. У йўл ҳам шлагбаум билан ёпилган. Учинчи йўл эса ўша сиз кўрган, мактаб болалари қўрқиб ўтиб-қайтувчи омонат кўприк устидаги йўл. У йўлдан машинада юриш қийин. Жудаям қўрқинчли йўл у, дейди мурожаатчи Лочин Эргашев.

Фуқаро Тошкент шаҳар ҳокими Шавкат Умурзоқовга мурожаат қилиб, икки туман — Сергели ва Янгиҳаёт ҳокимликлари масъулларининг ер билан боғлиқ келишмовчилиги сабаб одамлар азият чекаётганини айтиб, фуқаролари ҳолидан хабар олишини, муаммони ечишда кўмак беришини сўради.

Майли, мана шу иккита кичкина ҳокимият ҳеч нарсани ҳал қила олмас экан. Биз худди бу ерда бегонадек бўлиб, қоляпмиз. Бу ерда мингдан ортиқ хонадон шунчаки ўз уйига кириб чиқолмай ўтирадими? Буларнинг тирикчилиги нима бўлади? Уйини ремонт қилиши керак. Қайси бири машинада ўтади? Бола-чақаси бор, ногирони бор, қарияси бор, машинада ўтишга муҳтож бўлган фуқаролари бор. Бу шунчаки одамларнинг устидан кулишми? Иккита ҳокимлик масъулиятни бир-бирига ағдармоқда. Ундай бўлса тепароқдан шаҳар ҳокими келсин. Шавкат ака Умрзоқовми? Ўша киши келсин. Вазиятга баҳо берсин. Кўрсангиз бу ерни Тошкент шаҳри деб ўйламайсиз. Ўзбекистон пойтахтининг аҳволи шуми?, дейди Лочин Эргашев.

Лочин Эргашевнинг айтишича, у хусусий клиника эгасининг йўлни ёпиб олгани билан боғлиқ муаммо ҳақида Президент порталига шикоят қилган. Аммо ечим топилмаган.

Бу муаммо ҳақида шахсан икки марта порталга ёзганман. Ички ишларга биринчи қўнғироқ қилганимда, маҳалла “участкавойи” иложимиз йўқ деган. Порталга ёзилди қайта-қайта. Ҳамма нарса порталда ҳал бўлган, лекин бу ёқдаги ҳал бўлмаяпти, чунки “ШоҳМед” масаласи бўлгани учун. Келган масъул ходимлар “ака, мана бунақа деб қулоққа шивирлаб, бу ерда мана шунақа одам яшайди”, деб кетишади, дейди у.

Янгиҳаёт ҳокимлиги аҳоли эътирози ва одамларнинг йўлни ҳокимликка тегишли техникалар бузгани ҳақидаги айбловларига жавоб берар экан қазиш ишлари ҳудудда коммуникация тармоқларидаги таъмирлаш ишлари олиб борилиши билан боғлиқлигини тушунтирди.

Уй-жой, коммунал хизмат кўрсатиш бўлими бош мутахассиси Абдулатиф Ваҳобовнинг маълум қилишича, мазкур ҳудудда коммуникация тармоқларида таъмирлаш ишлари олиб борилаётгани сабабли йўлдан фойдаланиш вақтинчалик чекланган, дейди ҳокимлик ахборот хизмати раҳбари.