Қорақалпоғистон Республикаси ва Андижон вилоятида ер майдонларини олиб беришни ваъда қилган шахслар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Тахтакўпир туманида фуқаро С.П. фуқаро А.К.нинг ишончига кириб, қалбаки ҳужжатлар асосида расмийлаштирилган Нукус шаҳри ҳудудидаги 3,6 сотих ер участкасини 170 млн сўмга сотишга келишган. Ушбу пулларни фирибгарлик йўли билан олган вақтида ушланган.
Шунингдек, Андижон туманида фуқаро Н.Н. фуқаро Х.А.га “У.Д.” қўшма корхонасига ажратилган ер майдонининг 4 сотихини гўёки кадастр бўлимида ишловчи танишлари орқали 10,5 минг доллар эвазига турар жой сифатида расмийлаштириб беришини айтган. Ушбу пуллар ҳисобидан 5,5 минг долларни олган вақтида ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Ер сотиш ҳолатлари
Аввалроқ Тошкентда Давлат кадастрлар палатаси туман филиали бошлиғи 25 минг доллар олаётганида ушланганди. Шунингдек, Навоий, Наманган ва Андижон вилоятларида ноқонуний йўллар билан ер майдонлари олиб беришни ваъда қилган шахслар қўлга олинган.
Изоҳ (0)