АҚШ президенти Дональд Трамп Украинанинг нодир ер элементларини Америка ёрдами эвазига олишга қизиқиш билдирди. Бу ҳақда Оқ уй матбуот хизматига таяниб AP хабар берди.
Биз Украина билан шундай битим тузмоқчимизки, унга кўра, улар биздан олаётган нарсалар эвазига бизга нодир ер элементлари ва бошқа маҳсулотларни беришади, деди Трамп.
У нодир ер элементлари етказиб берилишининг хавфсизлигини таъминлашни истаётганини ва Украина бу борада ёрдам беришга тайёр эканлигини қўшимча қилди.
Биз юзлаб миллиард доллар сармоя киритмоқдамиз. Уларда ажойиб нодир ер элементлари мавжуд, деб таъкидлади АҚШ президенти.
Украинанинг АҚШ билан ноёб минералларни биргаликда қазиб олиш бўйича таклифи мамлакат президенти Владимир Зеленский 2024 йил октябрда — Америкадаги президентлик сайловидан олдин, Трамп ва республикачи конгрессменларга тақдим этган “ғалаба режаси”нинг бандларидан бири ҳисобланади. Бу ҳақда Financial Times (FТ) нашри ёзган, кейинроқ эса Украина президенти офиси маслаҳатчиси Михаил Подоляк ушбу маълумотни тасдиқлаган ва гап, хусусан, литий ва титан конлари ҳақида кетаётганига аниқлик киритган.
ФТ маълумотларига кўра, ушбу банд ҳамда Европадаги Америка ҳарбий контингентини қисман Украина қўшинлари билан алмаштириш таклифи республикачи номзодни қизиқтирган.
Зеленскийнинг “ғалаба режаси” бешта ошкора ва учта махфий бандни ўз ичига олади. Оммавий қоидалар, муҳим ресурслар соҳасидаги ҳамкорлик ва Америка қўшинларини украин қўшинлари билан алмаштиришдан ташқари, можаронинг тугашидан олдин Украинани НАТОга таклиф этилиши, унинг мудофаасини кучайтириш, “комплекс ядровий бўлмаган стратегик тийиб турувчи пакет”ни жойлаштириш масалаларини қамраб олади.
Украина Атроф-муҳит ва табиий ресурсларни муҳофаза қилиш вазирлиги мамлакатда дунёдаги барча муҳим хом ашё, жумладан, ноёб ер элементлари захираларининг 5 фоизи мавжудлигини маълум қилган.
Украинанинг нодир ер металлари конларининг бир қисми Россия босиб олган ҳудудларда жойлашган. Американинг ОilPrice портали уруш бошланганидан бери Украина тўртта литий конининг иккитаси устидан назоратни йўқотгани ҳақида ёзган. Украинада 500 минг тоннага яқин литий захиралари мавжуд бўлиб, бу Европадаги энг йирик конлардан биридир.
Украинада Зеленскийнинг ғалаба режасида 1991 йилги чегараларга қайтиш талаби йўқлиги таъкидланган.
Изоҳ (0)