Navoiy viloyatida yer maydonini noqonuniy sotish bilan bog‘liq firibgarlik holatining oldi olindi. Bu haqda Bosh prokuratura huzuridagi departament xabar berdi.
Qayd etilishicha, Bosh prokuratura huzuridagi departament, DXX va IIVning Navoiy viloyati boshqarmalari tomonidan tezkor tadbir o‘tkazilgan. Tadbir davomida Nurota tumanida yashovchi N.T. ismli fuqaro “J.B.” fermer xo‘jaligi rahbari Y.N. bilan o‘zaro til biriktirib, xo‘jalikning 80 gektar yer maydonini firibgarlik yo‘li bilan fuqaro M.X.ga 1 milliard so‘mga sotishga kelishgani aniqlangan. Ular oldindan 700 million so‘mni olgan vaqtlarida ashyoviy dalillar bilan ushlangan.
Shu kabi, departamentning Navoiy viloyat boshqarmasi tomonidan IIB xodimlari bilan hamkorlikda o‘tkazilgan yana bir tezkor tadbirda Nurota tumanida yashovchi Z.X. “M.B.” oilaviy korxonasi rahbari B.M. bilan o‘zaro til biriktirgani aniqlangan. Ular ushbu korxonaga qarashli yer maydoni bilan birga davlat zaxirasidan yana 16 gektar, jami 32 gektar yer maydonini fuqaro T.K.ga 30 ming dollarga sotishga kelishib, oldindan 15 ming dollarni olgan vaqtlarida ashyoviy dalillar bilan ushlangan.
Shuningdek, Izboskan tumanida o‘tkazilgan tezkor tadbirda fuqaro A.U. “U.M.” bog‘dorchilik fermer xo‘jaligiga qarashli 0,10 gektar yer maydonini go‘yoki yuqori lavozimda ishlovchi tanishlari yordamida fuqaro A.B.ga rasmiylashtirib olib berishi evaziga 15 ming dollarni olgan vaqtida ashyoviy dalillar bilan ushlangan.
Departamentning Jomboy tuman bo‘limi tomonidan, DXX va IIB xodimlari bilan hamkorlikda o‘tkazilgan tezkor tadbirda esa fuqaro L.J. fuqaro B.K.ning ishonchiga kirib, unga Toyloq tumani hududidagi 0,13 gektar sug‘oriladigan yer maydonini 13 ming dollarga sotishga kelishib, shundan 10,5 ming dollarni olgan vaqtida ashyoviy dalillar bilan qo‘lga olingan.
Mazkur holatlar yuzasidan Jinoyat kodeksining 168-moddasi (firibgarlik) va 28,211-moddasi (pora berish) bilan jinoyat ishlari qo‘zg‘atilib, tergov harakatlari olib borilmoqda.
Izoh (0)