Тошкент вилояти судининг Фуқаролик ишлари бўйича судлов ҳайъати “Хонсарой” лойиҳаси ташаббускори — Апелсин Residence ва Қибрай тумани ҳокимлиги ўртасидаги можарони кўриб чиқишда ОАВ вакиллари фаолиятига чеклов қўйди. Очиқ судда қатнашган “Дарё” журналисти жараёндан на фото, на видео ва на аудиоёзувлар ололди.
Кеча, 30 январь куни Тошкент вилояти судининг Фуқаролик ишлари бўйича судлов ҳайъати судья Шарофиддин Ҳамроев раислигида жамоатчиликка “Хонсарой” лойиҳаси ташаббускорлари сифатида яхши таниш бўлган тадбиркорлик субъекти ва Қибрай тумани ҳокимлиги ўртасидаги ер билан боғлиқ можарони кўриб чиқди.
“Дарё” таҳририяти судлов ҳайъатига мазкур очиқ суд мажлисидан фото, аудио ҳамда видеоматериаллар олиш учун рухсат сўраб, илтимоснома киритганди. Суд тарафлар фикрини ўрганар экан, даъвогар ва жавобгарнинг қарши эмаслигини, бироқ, ишда иштирок этаётган давлат айбловчисининг фуқаро кийимида бўлгани учун тасвирга олиш жараёнларига қаршилигини рўкач қилиб, нашрнинг бу илтимосномасини рад этди.
Мен айни пайтда фуқаро кийимидаман. Биз ОАВга чиқсак, прокурор формасида бўлишимиз керак. Шу сабаб бу суд мажлисида ОАВнинг тасвирга олишига қаршилигимни айтиб, судлов ҳайъатидан бу илтимосномани рад этишни сўрадим, — дейди “Дарё” журналистига тушунтириш берган Тошкент вилояти прокуратурасининг 14-бўлим прокурори Мирзабобур Каримбердиев.
Давлат айбловчиси журналистнинг “Сиз судда фуқаро кийимида бўлишингиз мумкинми? Одатда судда ҳам прокурор кийимида бўлишингиз керак эмасми?”, деган саволига “Ҳа, судда фуқаро кийимида қатнашишим мумкин”, деган жавобни берди.
Судлов ҳайъати раиси Шарофиддин Ҳамроев ҳам илтимосноманинг рад этилиши айнан прокурор эътирозига боғлиқлигини таъкидлади.
“Дарё” журналисти билан суҳбатлашган адвокатлардан бирининг маълумот беришича, Бош прокурорнинг 250-сонли буйруғида прокуратура ходимларининг қачон формали кийим бошда юриши ҳақида ҳам сўз борган бўлиб, айнан судларда улар формали кийим бошда бўлиши талаб этилади.
Судда қатнашган давлат айбловчиси формасиз суд жараёнида иштирок этиб хатога йўл қўйгани етмаганидек, судьяни ҳам қонунни бузишига, очиқ суд мажлисида ОАВ вакилининг фаолиятига асоссиз чеклов қўйишига сабабчи бўлган, дейди адвокат.
Изоҳ (0)