Ўзбекистонда камбағаллик даражаси 2024 йил якунига кўра 11 фоиздан 8,9 фоизга камайди. Бу ҳақда Камбағалликни қисқартириш ва бандлик вазирлиги хабар бермоқда.
Қайде этилишича, 2024 йил якунида камбағаллик даражаси 3,3 миллион кишига ёки 2023 йилга нисбатан 719 мингга камайган. Бу натижа Жаҳон банки билан ҳамкорликда олиб борилган тадқиқотлар асосида аниқланган.
Камбағаллик даражаси энг юқори пасайишлар:
- Бухоро вилоятида — 11,8 фоиздан 8,7 фоизгача;
- Самарқанд вилоятида — 10,5 фоиздан 7,5 фоизгача;
- Наманган вилоятида — 10,4 фоиздан 7,6 фоизгача;
- Қорақалпоғистон Республикасида — 13,6 фоиздан 10,8 фоизгача қайд этилди.
2024 йилда аҳоли бандлигини таъминлаш, тадбиркорликка жалб қилиш, томорқа ва деҳқончилик учун ажратилган ер майдонларидан фойдаланиш самарадорлигини ошириш бўйича кўрилган чоралар мамлакатда камбағаллик даражасини пасайтиришга катта ҳисса қўшди.
Бунинг натижасида 2024 йилда аҳолининг реал даромади 10,7 фоизга ўсиб, жон бошига ойига ўртача 2,1 млн сўмдан тўғри келди (йил бошида – 1,7 млн сўм).
Жумладан, аҳоли даромадлари таркибида:
- иш ҳақи – 42,6 фоиз (2023 йилда – 41,9 фоиз);
- тадбиркорликдан даромадлар – 22,9 фоиз (21,4 фоиз);
- пенсия, ижтимоий ёрдам ва субсидиялар – 18,2 фоиз (18,9 фоиз);
- қишлоқ хўжалиги ва томорқадан даромадлар – 10,7 фоиз (9,8 фоиз);
- хориждан пул ўтказмалар – 2,0 фоиз (3,1 фоиз);
- бошқа даромадлар – 3,6 фоиз (4,9 фоиз)ни ташкил этди.
Аҳолининг иш ҳақидан даромадлари эса 2023 йилга нисбатан 12,9 фоизга кўпайди.
2023 йил якунида камбағаллик даражаси 11 фоизгача пасайганди. 2022 йил натижаларида камбағаллик даражаси 14 фоизни ташкил этган. Шавкат Мирзиёев 2024 йил сентябрида Осиё инфратузилмавий инвестициялар банки Бошқарувчилари кенгашининг тўққизинчи йиллик йиғилишида сўзлаган нутқида тўрт йил ичида Ўзбекистондаги камбағаллик даражасини 23 фоиздан 11 фоизга туширишга эришилгани таъкидлаб, 2024 йилда бу кўрсаткични 9 фоизгача, 2030 йилга қадар эса 2 баробар пасайтириш мақсад қилинганини айтганди.
Ўзбекистонда камбағалликни қисқартириш
Шавкат Мирзиёев маҳаллаларда камбағалликни қисқартириш, камбағал оилалар билан ишлаш тизимини янги босқичга олиб чиқиш чора-тадбирлари юзасидан 2024 йилнинг сентябрида ўтказган видеоселектор йиғилишида Ўзбекистонда камбағалликни қисқартириш умуммиллий ҳаракатга айланишини, “Камбағалликдан фаровонлик сари” дастури тайёрланаётганини айтганди. Дастур шу йилнинг ўзида 500 минг, 2025 йилда яна 1 миллион кишини камбағалликдан чиқаришга қаратилган.
24 сентябрь куни “Камбағалликни қисқартириш ва аҳоли турмуш фаровонлигини ошириш борасидаги чора-тадбирларни янги босқичга олиб чиқиш тўғрисида”ги президент фармони қабул қилинди. Ҳужжат билан “Камбағалликдан фаровонлик сари” дастури амалга оширилиши белгиланди.
Шавкат Мирзиёев маҳаллаларда камбағалликни қисқартириш, камбағал оилалар билан ишлаш тизимини янги босқичга олиб чиқиш чора-тадбирлари юзасидан 11 сентябрь куни ўтказилган видеоселектор йиғилишида “Одамларга қанча ёрдам бермайлик, маҳаллалар шароитини яхшиламасак, камбағаллик қисқармайди”, деб айтганди.
Шу боис 2025 йилда маҳаллалар инфратузилмасини ривожлантиришга барча манбалардан 1,6 миллиард доллар ажратилади. Бу маблағларнинг 1,2 триллион сўми, аввало, энг оғир 300 та маҳаллада сув насослари ва қуёш панеллари ўрнатишга берилади. Яна 2 триллион сўм ҳисобидан энг оғир 500 та маҳаллада электр, йўл, интернет ва бошқа инфратузилма масалалари ҳал этилади.
Изоҳ (0)