Navoiy, Namangan va Andijon viloyatlarida noqonuniy yo‘llar bilan yer maydonlari olib berishni vaʼda qilgan shaxslar qo‘lga olindi. Bu haqda Bosh prokuratura huzuridagi departament xabar berdi.
Qayd etilishicha, departament hamda DXXning Navoiy viloyati boshqarmalari tomonidan tezkor tadbir o‘tkazilgan. Tadbirda fuqaro X.Y. Karmana tumanidagi “K.” fermer xo‘jaligining 3 gektar yer maydonini fuqaro Sh.X.ga kadastr hujjatlarini rasmiylashtirib olib berishi evaziga 28 ming dollar va 200 million so‘mni olgan vaqtida ashyoviy dalillar bilan ushlangan.
Departament hamda DXXning To‘raqo‘rg‘on tumani bo‘limlari tomonidan o‘tkazilgan tezkor tadbirda fuqaro S.K. boshqa bir fuqaro M.K.ning bog‘dorchilikka ixtisoslashgan 27 sotix yer maydonini fuqaro B.Z.ga tanishlari yordamida 15 ming dollar evaziga rasmiylashtirib olib berishini aytib, oldindan 3,4 ming dollar va 7,4 million so‘mni olgan vaqtida ashyoviy dalillar bilan ushlangan.
Shu kabi, departamentning Paxtaobod tuman bo‘limi DXX va IIB xodimlari hamkorligida o‘tkazilgan tezkor tadbirda “B.Q.” fermer xo‘jaligi ish yurituvchisi N.B. fuqaro Z.B.ga dehqon xo‘jaligi tashkil qilish uchun ajratilgan 10 sotix yer maydonini fuqaro Yu.N.ga 8 ming dollarga uy-joy qurish uchun sotishga kelishib, go‘yoki kadastr bo‘limida ishlovchi tanishlari yordamida hujjatlarini rasmiylashtirib berishi evaziga 1,6 ming dollarni qo‘lga kiritib, yana 1,4 ming dollarni olgan vaqtida ashyoviy dalillar bilan birga ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
- Avvalroq Sirdaryoda besh gektar yer maydonini 40 ming AQSH dollariga sotishga uringan opa-uka qo‘lga olingan edi.
- Aprel boshlarida esa Navoiyda 80 gektar yerni 1 milliard so‘mga sotishga uringan shaxslar ushlangani,
- Samarqand va Farg‘onada noqonuniy yer sotish holatlariga chek qo‘yilgani to‘g‘risida xabar berilgandi.
Izoh (0)