Россия Монголияда атом электр станциясини қуради. “Росатом” раҳбари Алексей Лихачев лойиҳа деталлари муҳокама қилинаётганини айтди. Бу ҳақда “РИА Новости” хабар берди.
![](/static/2024/09/03/photo_2024-09-03_20-42-12-7sYOjFQ7.jpg)
Атом электр станциясини Янги Хархорум ҳудудида қуриш режалаштирилган.
“Монголия учун кичик АЭС лойиҳасининг техник кўриниши амалда тасдиқланди”, дейди Алексей Лихачев.
Станция дастлаб Россия ташкилоти томонидан эксплуатация қилиниши кўриб чиқилмоқда.
Баҳорда Сочидаги “Атомекспо” форумида Монголияда кичик модулли атом электр станциясини қуриш бўйича йўл харитаси имзоланди. Айнан 220 дан 330 мегаваттгача бўлган қувват Монголиянинг янги пойтахти Янги Хархорум учун зарур, дея таъкидлади “Росатом” раҳбари.
У 2 сентябрь куни “Монатом”, Энергетика вазирлиги ва Монголия Хавфсизлик кенгаши билан кўп босқичли музокаралар ўтказилганини маълум қилди. Ҳозирда кадрлар масаласи кун тартибида турибди.
Биз буни жуда батафсил муҳокама қилдик, монголиялик дўстларимиз, албатта, биринчи босқичда ушбу станцияни бошқарувчи ташкилот ҳатто Россия ташкилоти бўлиши мумкинлигини кўриб чиқмоқда, дея тушунтирди Лихачев.
Ҳозирда Қозоғистонда ҳам АЭС қурилиши масаласи ҳал қилинмоқда. Республика президенти Қосим-Жўмарт Тўқаев халққа қилган мурожаатномасида Қозоғистонда АЭС бўйича референдум 6 октябрда ўтказилишини айтди. Станцияни қуришда иштирок этиши мумкин бўлган компаниялар орасида Қозоғистон ҳукумати “Росатом”, КHNP (Жанубий Корея), EDF (Франция) ва China National Nuclear Corporation’ни (Хитой) танлаган.
Россия Ўзбекистонда АЭС қуради
Россия президенти Владимир Путиннинг Ўзбекистонга давлат ташрифи доирасида 27 май Жиззахда атом электр станцияси қуришдаги ҳамкорликка оид ҳукуматлараро битимга ўзгартириш киритиш тўғрисидаги баённома имзоланди. Шу куни “Ўзатом” агентлиги ҳузуридаги “АЭС қурилиши дирексияси” ДУК ва “Росатом” тузилмасидаги “Атомстроекспорт” АЖ инжиниринг компанияси ўртасида Ўзбекистонда кам қувватли атом электр станцияси қурилиши бўйича шартнома тузилди.
Имзоланган келишувларга асосан, Жиззах вилоятида Россия лойиҳаси асосида 330 МВт қувватга эга (ҳар бири 55 МВт қувватли 6 та реактордан иборат) АЭС қурилади. Станция қурилишида “Росатом” бош пудратчи бўлади, Ўзбекистон компаниялари ҳам иштирок этади.
Изоҳ (0)