Қозоғистон ҳукумати биринчи АЭС қурилиши харажатларини 10-15 миллиард долларга баҳоламоқда. Бу ҳақда “Қозоғистон атом электр станциялари” акциядорлик жамияти бош директори Тимур Жантикин маълум қилди.
Ҳозирда молиялаштириш манбалари ишлаб чиқилмоқда. Булар асосан халқаро молия институтлари маблағларидан иборат. Лойиҳа ҳали ҳам ҳукумат аралашувисиз, тижорий лойиҳа сифатида кўриб чиқилмоқда, - деди у.
Қозоғистон президенти Қосим-Жўмарт Тўқаев 1 сентябрь куни мамлакат халқига мурожаатида АЭС қуриш масаласини умумхалқ референдумига қўйишни таклиф қилганди. Унинг фикрича, бу борада жамоатчилик муҳокамаларини давом эттириш зарур.
Аввалроқ Қозоғистон Энергетика вазирлиги тадқиқот натижаларига кўра Олма-ота вилоятининг Жамбил туманидаги Ulken қишлоғи ҳудуди атом электр станциясини қуриш учун энг мақбул ҳудуд сифатида танлангани ҳақида хабар берган эди. Ҳукумат ҳозирда ядро технологияларининг бир нечта потенциал етказиб берувчиларини кўриб чиқмоқда. Булар Хитойнинг CNNC, Жанубий Кореянинг КHNP, Россиянинг “Росатом” ва Франциянинг EDF компаниялари.
Изоҳ (0)