Қозоғистон Марказий сайлов комиссияси АЭС бўйича референдум ўтказиш учун 15,5 миллиард тенге (32,1 миллион доллар) сарфлашни режалаштирмоқда. Бу ҳақда Sputnik хабар берди.
МСК харажатларнинг тахминий (дастлабки) сметасини ишлаб чиқади ва кўриб чиқиш учун ҳукуматга тақдим этади.
Табиий равишда, биз тайёргарлик кўрдик ва ҳисоб-китоб қилдик. Бизнинг сметамизга кўра, харажатларнинг умумий миқдори 15,5 миллиард тенгени ташкил этади. Бу сумма дунёнинг 63 мамлакатида жойлашган 78 та хорижий сайлов участкасида референдумни ташкил этиш ва ўтказиш харажатларини ўз ичига олади”, деди МСК аъзоси Сабила Мустафина.
Умумий маблағнинг 71 фоизи барча даражадаги комиссия аъзоларининг иш ҳақига сарфланади. Сабила Мустафина молиявий маблағларни комиссия раиси тасарруф этишини айтди. Бундан ташқари, маблағлар давлат аудити ва молиявий назорат органлари томонидан ҳам назорат қилинади.
Мамлакат президенти Қосим-Жўмарт Тўқаев халққа қилган мурожаатномасида Қозоғистонда АЭС бўйича референдум 6 октябрда ўтказилишини айтганди. Станцияни қуришда иштирок этиши мумкин бўлган компаниялар орасида Қозоғистон ҳукумати “Росатом”, KHNP (Жанубий Корея), EDF (Франция) ва China National Nuclear Corporation’ни (Хитой) танлаган.
Россия Ўзбекистонда АЭС қуради
Россия президенти Владимир Путиннинг Ўзбекистонга давлат ташрифи доирасида 27 май Жиззахда атом электр станцияси қуришдаги ҳамкорликка оид ҳукуматлараро битимга ўзгартириш киритиш тўғрисидаги баённома имзоланди. Шу куни “Ўзатом” агентлиги ҳузуридаги “АЭС қурилиши дирексияси” ДУК ва “Росатом” тузилмасидаги “Атомстроекспорт” АЖ инжиниринг компанияси ўртасида Ўзбекистонда кам қувватли атом электр станцияси қурилиши бўйича шартнома тузилди.
Имзоланган келишувларга асосан, Жиззах вилоятида Россия лойиҳаси асосида 330 МВт қувватга эга (ҳар бири 55 МВт қувватли 6 та реактордан иборат) АЭС қурилади. Станция қурилишида “Росатом” бош пудратчи бўлади, Ўзбекистон компаниялари ҳам иштирок этади.
Изоҳ (0)