Қозоғистон АҚШ компанияларининг республикадаги биринчи атом электр станциясини қуриш бўйича таклифларини кейинга қолдирди.
Бу ҳақда Уст-Каменогорскда атом электр станциялари масаласига бағишланган очиқ эшитувда “Қозоғистон атом электр станциялари” компанияси бош директори Тимур Жантикин маълум қилди.
“Қўшма Штатлар кичик модулли реакторлар асосидаги иккита лойиҳани таклиф қилди. Биз уларни кўриб чиқишни ҳозирча кейинга қолдирдик, чунки улар учун ишлайдиган атом электр станциялари йўқ ва бу турли хавфларни келтириб чиқариши мумкин”, — деди Жантикин.
Қозоғистон президенти Қосим-Жўмарт Тўқаев 1 сентябрь куни мамлакат халқига қилган мурожаатномасида атом электр станциясини қуриш масаласини умумхалқ референдумига қўйишни таклиф қилган эди. Унинг фикрича, бу борада жамоатчилик муҳокамаларини давом эттириш зарур. Референдум санаси жамоатчилик билан маслаҳатлашилганидан кейин белгиланади.
Ҳукумат ҳозирда ядро технологияларининг бир нечта потенциал етказиб берувчиларини кўриб чиқмоқда: Хитойнинг CNNC компанияси, Жанубий Кореянинг КHNP, Франциянинг EDF ва Россиянинг Росатом давлат корпорацияси.
Изоҳ (0)