Қозоғистон ҳукумати мамлакатда атом электр станциясини қуриш масаласи бўйича умумхалқ референдумини ўтказиш тўғрисида қарор қабул қилди. Жамоатчилик муҳокамаларида фаоллар экологик вазиятнинг ёмонлашуви хавфи туфайли АЭС қурилишига қарши чиқди.
Қарор ҳукуматга Қозоғистон энергетика вазири Алмасадам Саткалиэв томонидан тақдим этилди. Бош вазир Олжас Бектенов қарор лойиҳасини президент администрациясига киритиш бўйича топшириқ берди.
Президент Қосим-Жўмарт Тўқаев 2023 йил сентябрь ойида АЭС қурилиши бўйича референдум ўтказишни таклиф этганди. У бир томондан, Қозоғистон дунёдаги энг йирик уран ишлаб чиқарувчиси сифатида “ўз атом энергия ишлаб чиқаришига эга бўлиши лозим”лигини айтган. Бошқа томондан, “Семипалатинск ядро полигонининг фожиали мероси”ни инобатга олган ҳолда, референдумни зарур деб ҳисоблаган.
Қозоғистонда референдум эълон қилинишидан олдин АЭС қуриш бўйича жамоатчилик муҳокамаси бўлиб ўтган. Унда экологлар ва фаоллар радиоактив чиқиндиларни нотўғри утилизация қилиш билан боғлиқ хавфлар туфайли лойиҳани амалга оширишга қарши чиққан.
Изоҳ (0)