Франция ҳукумати Қозоғистонга Ground Master 400 ҳаво ҳужумидан мудофаа радар тизимини етказиб беради. Париж Марказий Осиё республикаси “суверенитетини мустаҳкамлаш” учун шундай қадам ташлади, деб хабар бермоқда France24. Тегишли келишувларга Франция президенти Эммануэл Макроннинг Остонага ташрифи чоғида эришилган.
Ground Master 400 радари турли ҳаво нишонларини, жумладан, кичик дронларни аниқлашга қодир зенит радар. Тизим битта контейнерга жойлаштирилади, оғирлиги ўн тоннадан кам.
France24, шунингдек, Франциянинг EDF энергетика корпорацияси Қозоғистондаги биринчи атом электр станциясини қуриш бўйича пудратчилар тендерида иштирок этишини таъкидлади. Бу борада европаликлар билан учта компания рақобатлашади: Хитойнинг CNNC, Кореянинг КHNP ва Россиянинг “Росатом” компаниялари. Қозоғистонда АЭС қуриш масаласи ҳалигача ҳал этилмаган, у умумхалқ референдумида аниқланади.
Франция Қозоғистоннинг асосий ҳамкорларидан бўлиб, Париж Остонага киритилаётган инвестициялар ҳажми бўйича Марказий Осиёдаги географик қўшни Хитойдан ҳам олдинда. Бунда TotalEnergies энергетика гиганти муҳим рол ўйнайди.
Расмий маълумотларга кўра, айнан Қозоғистон Франциянинг уранга бўлган эҳтиёжининг қарийб 40 фоизини таъминлайди.
Макрон ва Қосим-Жўмарт Тўқаев авиация саноати, фармацевтика ва таълим соҳаларига тааллуқли бир қатор келишувларни имзолади. Энг муҳим ҳужжатлардан бири стратегик фойдали қазилмалар бўйича ҳамкорлик тўғрисидаги декларация бўлди. Гап шундаки, Нигердаги ҳарбий тўнтаришдан сўнг Африка давлати Парижга уран етказиб беришни тўхтатган. Шунинг учун Франция хом ашёни импорт қилиш учун янги имкониятлар қидирмоқда. Уран қазиб олиш бўйича дунёда етакчилардан бўлган Қозоғистон ва Ўзбекистон Европа давлатида алоҳида қизиқиш уйғотмоқда.
Изоҳ (0)