Қозоғистон ҳукумати 6 октябрь куни бўлиб ўтадиган референдумда атом электр станциясини (АЭС) қуриш бўйича ижобий қарор қабул қилинган тақдирда, АЭСда маҳаллий кадрлар ишлашини кутмоқда. Бу ҳақда Қозоғистон энергетика вазири Алмасадам Саткалиев маълум қилди.
“Ишончимиз комилки, зарур малакага ҳамда турли мамлакатлардаги АЭСларда тажрибага эга бўлиб айнан қозоғистонлик мутахассислар юқори даражада ишлай олади. Қурилишни амалга оширадиган потенциал vendorни танлашда биз, албатта, маҳаллий мутахассисларни тўлиқ тайёрлаш, илмий-амалий базани ривожлантириш, ижтимоий инвестициялар учун зарур шарт-шароитларни яратишга қаратамиз” деди Саткалиев.
Унинг қайд этишича, Атом энергияси бўйича халқаро агентлик аллақачон қозоғистонлик мутахассислар билан ҳамкорлик қилиш истагини билдирган.
Вазирнинг сўзларига кўра, Қозоғистонда ядро реакторлари билан ишлаш тажрибасига эга кадрлар мавжуд. У мамлакатда ядро маркази мутахассислари, Ядро физикаси институти мутахассислари борлигини, икки мингга яқин одамлар энг кенг ва илмий ваколатларга эга эканини қўшимча қилган.
Вазир, шунингдек, атом электр станцияси қурилса, қатъий молиявий назорат сақланишини таъкидлаб, МАГАТЕнинг мунтазам миссиялари асосида халқаро мониторинг амалга оширилишини қайд этган.
Қозоғистон президенти Қосим-Жўмарт Тўқаев 2 сентябрь куни мамлакатда АЭС қуриш бўйича 6 октябрь куни референдум ўтказиш тўғрисидаги фармонни имзолаган эди. Референдумни ташкил этиш ва ўтказиш Марказий сайлов комиссиясига юклатилган.
Қозоғистон Энергетика вазирлигининг маълум қилишича, тадқиқот натижаларига кўра, Олмаота вилояти, Жамбил тумани, Улкен қишлоғи ҳудуди станция қуриш учун энг мақбул ҳудуд деб топилган. Қозоғистон ҳукумати ядро технологияларининг бир нечта потенциал етказиб берувчилари – Хитойнинг CNNC компанияси, Жанубий Кореянинг КҲНП, Росатом ва Франциянинг EDF компанияларини кўриб чиқмоқда.
Изоҳ (0)