Ўзбекистон миллий терма жамоасига бош мураббий сифатида Тимур Кападзе тайинланди. У иккинчи бор миллий жамоа бошқарувига келмоқда. Бундай натижа қайт этган Ўзбекистон терма жамоаси мураббийлари сони 4 тага етди. Бу ҳақда мутахассис Алишер Никимбаев ўз Telegram каналида маълум қилди.
Ундан аввал Равшан Ҳайдаров, Миржалол Қосимов ва Вадим Абрамов жамоани икки бор қабул қилиб олганди.
Шу билан бирга, Равшан Акмалович миллий терма жамоадан бутунлай кетмаган. 2001 йил декабрида бош мураббий этиб тайинланган Ҳайдаров 23 та ўйин ўтказган, кейин эса Юрген Гёденинг ёрдамчиси сифатида фаолиятини давом эттирган. Гёде истеъфога чиққанидан кейин у яна бош мураббий этиб тайинланиб, 2 та ўйинда терма жамоани бошқарган, сўнгра Боб Хоутоннинг ёрдамчисига айланган.
“Миржалол Қўшақовичнинг миллий терма жамоа бошқарувига келган икки муддат ўртасидаги танаффус бир оз қисқароқ бўлган — 2010 йил мартидан 2012 йил июнигача. Қосимов биринчи бор бош мураббийлик курсисида 14 та ўйин ўтказган бўлса, иккинчи муддатда бу рақам 40 тага етган.
Вадим Карленович биринчи даврдаги охирги ўйин билан иккинчи даврдаги биринчи ўйин орасида 7 йилдан ошиқ танаффус қилган — 2012 йил июнидан 2019 йил октябригача. Биринчи муддатда у 28 та ўйин ўтказган, иккинчи муддатда эса ўйинлар сони 16 тани ташкил қилган.
Тимур Кападзе эса ушбу учликдан бир жиҳати билан фарқ қилади: унинг миллий терма жамоадаги биринчи муддати 2018 йил баҳорида вақтинчалик мураббий сифатида бўлган. Шу сабабли Кападзе фақат 4 та ўйинда жамоани бошқарган. Бу ўйинларнинг учтасида жамоа мағлубиятга учраган, аммо мағлубиятлар ўша йилги Жаҳон чемпионати иштирокчилари — Марокаш, Эрон ва Уругвай терма жамоаларига қарши ўйинларда содир бўлган.
Уругвайга қарши ўйин 2018 йил 8 июнь куни бўлиб ўтган. Шундай экан, Қирғизистон билан бўладиган 2025 йил 20 мартдаги ўйинга қадар 6 йил ва 9,5 ойлик танаффус юзага келади”, дея маълумот беради Никимбаев.
Маълумот учун, 22 январь куни Сречко Катанец соғлиғи билан боғлиқ муаммолар сабабли Ўзбекистон миллий терма жамоаси бош мураббийлигидан кетганди.
Катанец қўл остида Ўзбекистон терма жамоаси Жаҳон чемпионатига саралаш босқичида 6 турдан кейин 13 очко билан иккинчи ўринда бормоқда. Гуруҳда 1 ва 2-ўринларни олган жамоалар мундиалга тўғридан тўғри йўлланмани қўлга киритади.
Кападзе бошчилигида U-23 жамоаси тарихда илк бор Олимпия йўлланмасини қўлга киритди.
2024 йил якунига кўра, Кападзе Ўзбекистонда йилнинг энг яхши мураббийи сифатида эътироф этилди.
Изоҳ (0)