O‘zbekiston milliy terma jamoasiga bosh murabbiy sifatida Timur Kapadze tayinlandi. U ikkinchi bor milliy jamoa boshqaruviga kelmoqda. Bunday natija qayt etgan O‘zbekiston terma jamoasi murabbiylari soni 4 taga yetdi. Bu haqda mutaxassis Alisher Nikimbayev o‘z Telegram kanalida ma’lum qildi.
Undan avval Ravshan Haydarov, Mirjalol Qosimov va Vadim Abramov jamoani ikki bor qabul qilib olgandi.
Shu bilan birga, Ravshan Akmalovich milliy terma jamoadan butunlay ketmagan. 2001-yil dekabrida bosh murabbiy etib tayinlangan Haydarov 23 ta o‘yin o‘tkazgan, keyin esa Yurgen Gyodening yordamchisi sifatida faoliyatini davom ettirgan. Gyode iste’foga chiqqanidan keyin u yana bosh murabbiy etib tayinlanib, 2 ta o‘yinda terma jamoani boshqargan, so‘ngra Bob Xoutonning yordamchisiga aylangan.
“Mirjalol Qo‘shaqovichning milliy terma jamoa boshqaruviga kelgan ikki muddat o‘rtasidagi tanaffus biroz qisqaroq bo‘lgan — 2010-yil martidan 2012-yil iyunigacha. Qosimov birinchi bor bosh murabbiylik kursisida 14 ta o‘yin o‘tkazgan bo‘lsa, ikkinchi muddatda bu raqam 40 taga yetgan.
Vadim Karlenovich birinchi davrdagi oxirgi o‘yin bilan ikkinchi davrdagi birinchi o‘yin orasida 7 yildan oshiq tanaffus qilgan — 2012-yil iyunidan 2019-yil oktyabrigacha. Birinchi muddatda u 28 ta o‘yin o‘tkazgan, ikkinchi muddatda esa o‘yinlar soni 16 tani tashkil qilgan.
Timur Kapadze esa ushbu uchlikdan bir jihati bilan farq qiladi: uning milliy terma jamoadagi birinchi muddati 2018-yil bahorida vaqtinchalik murabbiy sifatida bo‘lgan. Shu sababli Kapadze faqat 4 ta o‘yinda jamoani boshqargan. Bu o‘yinlarning uchtasida jamoa mag‘lubiyatga uchragan, ammo mag‘lubiyatlar o‘sha yilgi Jahon chempionati ishtirokchilari — Marokash, Eron va Urugvay terma jamoalariga qarshi o‘yinlarda sodir bo‘lgan.
Urugvayga qarshi o‘yin 2018-yil 8-iyun kuni bo‘lib o‘tgan. Shunday ekan, Qirg‘iziston bilan bo‘ladigan 2025-yil 20-martdagi o‘yinga qadar 6 yil va 9,5 oylik tanaffus yuzaga keladi”, deya ma’lumot beradi Nikimbayev.
Ma’lumot uchun, 22-yanvar kuni Srechko Katanes sog‘lig‘i bilan bog‘liq muammolar sababli O‘zbekiston milliy terma jamoasi bosh murabbiyligidan ketgandi.
Katanes qo‘l ostida O‘zbekiston terma jamoasi Jahon chempionatiga saralash bosqichida 6 turdan keyin 13 ochko bilan ikkinchi o‘rinda bormoqda. Guruhda 1 va 2-o‘rinlarni olgan jamoalar mundialga to‘g‘ridan to‘g‘ri yo‘llanmani qo‘lga kiritadi.
Kapadze boshchiligida U-23 jamoasi tarixda ilk bor Olimpiya yo‘llanmasini qo‘lga kiritdi.
2024-yil yakuniga ko‘ra, Kapadze O‘zbekistonda yilning eng yaxshi murabbiyi sifatida e’tirof etildi.
Izoh (0)