Ўзбекистон Олимпия терма жамоаси собиқ бош мураббийи Тимур Кападзе Сречко Катанес ва терма жамоа атрофидаги вазият бўйича фикр-мулоҳазаларини билдирди, дея хабар бермоқда Championat Асиа сайти.
Ўзбекистон терма жамоасидан таклиф тушдими? Менга ҳеч қандай таклиф бўлмади. Билишимча, Сречко Катанес бугунги рейс билан учиб келиши лозим эди, аммо унинг соғлиғи бунга йўл қўймаган. Ўқиганингиздек, кейинги ўйинларда терма бошқаруви бош мураббий ёрдамчилари Алеш Чех ҳамда Владо Радмановичга топширилган. Ҳозирча бошқа гап-сўз йўқ. Қолганини вақт кўрсатади. Бу – Ватан жамоаси. Ёрдам керак бўлса, ҳамиша тайёрмиз.
Бу жамоа ўйинига таъсир қиладими? Албатта, таъсир қилади. Ҳар ҳолда Сречко Катанес бош мураббий. Кўп йигитлар уни эшитади ва унинг айтганларини қилади. Бош мураббий – бу бош мураббий. Унинг ўрни бўлакча. Бир-иккита ўйинда ўрни билинмаслиги мумкин, аммо у бўлса, барибир бошқача. Аввало, Сречко Катанесга соғлиқ тилаймиз. Унга шифо тилаб, ҳеч кимга бундай дард бермасин деймиз. Ўйлайманки, ёрдамчи мураббийлар ҳам яхши мутахассислар сирасига киради. Жамоада анча вақтдан бери ишлашади, терма жамоани қандай тайёрлаш кераклигини яхши билишади. Сречко ҳам узоқдан бўлса-да, кўмаклашиб турса керак. Олдинда иккита муҳим ўйин турибди. Уйда ўйнаяпмиз, юз фоизлик натижа бизни Жаҳон Чемпионатига яқинлаштиради. Ўйлайманки, ассистентлар бу вазиятдан чиқиб кетади. Футболчилар ҳам бу нарсани тушунган ҳолда тажриба ва маҳоратларини ишга солишларига ишонамиз.
Тимур Кападзе
Аввалроқ Ўзбекистон терма жамоаси бош мураббийи Сречко Катанес соғлиғидаги муаммо туфайли октябрь ойидаги ўйинларда иштирок эта олмаслиги хабар қилинганди.
Маълумот учун, бугундан жамоа Тошкентда машғулотларга киришади ва 10 октябрь куни Эронга қарши майдонга тушади. БАА билан ўйин 15 октябрга режалаштирилган.
Изоҳ (0)